PUNE : परदेशी पाहुण्यांचा ‘हेरिटेज वॉक’

जी-२० बैठकीसाठी पुण्यात आलेल्या विविध देशांतील प्रतिनिधींनी आज येथील वारसास्थळांना भेट दिली. परदेशी पाहुण्यांसाठी ‘हेरिटेज वॉक’ अंतर्गत शनिवार वाडा, लाल महाल आणि नाना वाड्याला भेट आयोजित करण्यात आली होती.

शनिवारवाड्याची भव्यता पाहून पाहुणे अचंबित झाले. तर लाल महालमध्ये त्यांनी छत्रपती शिवाजी महाराजांच्या शौर्याचा इतिहास जाणून घेतला.

मंगळवारी सकाळी शनिवारवाड्यापासून हेरिटेज वॉकला सुरवात झाली. पारंपरिक ढोल ताशाच्या गजरात पाहुण्यांचे स्वागत करण्यात आले.

शनिवारवाड्याची भव्यता, प्रवेशद्वार, विस्तारलेला परिसर प्रतिनिधींनी आपल्या मोबाईलमध्ये टिपला. येथील इतिहासाविषयी उत्सुकतेने त्यांनी मार्गदर्शकांना प्रश्नही विचारले.

लाल महल येथे पारंपरिकपद्धतीन सनर्इ चौघड्याच्या वादन करून पाहुण्यांचे स्वागत करण्यात आले. राजमाता जिजाऊ आणि बाल शिवाजी महाराजांचा पुतळा पाहिल्यानंतर त्यामागचा इतिहासही त्यांनी जाणून घेतला.

महालातील छायाचित्रेही त्यांनी आपल्या मोबाईमध्ये टिपली. भेटीच्या अखेरच्या टप्प्यात प्रतिनिधींनी नाना वाडा येथे भेट देऊन तेथील इतिहास जाणून घेतला.

अजित आपटे, संदीप गोडबोले, सुप्रिया शेलार यांनी पाहुण्यांना पुण्याचा इतिहास आणि वारसा स्थळांबाबत माहिती दिली. यावेळी महानगरपालिका अतिरिक्त आयुक्त विकास ढाकणे, पोलिस उपायुक्त संदीपसिंह गिल, महानगरपालिकेचे शहर अभियंता प्रशांत वाघमारे उपस्थित होते. शनिवार वाडा येथे पिंगळा, वासुदेव, पारंपरिक गोंधळी कलाकारांनी कलेचे सादरीकरण केले.

गोंधळी बांधवांनी संकेतभाषा कला असलेली करपल्लवीचे सादरीकरण करत बोटांच्या संकेतातून पाहुण्यांची नावे ओळखल्याने पाहुण्यांनी आश्चर्य व्यक्त केले. संबळ, हलगीचे सादरीकरण करण्यात आले.

पारंपरिक कुंभार कलेअंतर्गत चाकावर मातीची भांडी करण्याची कला प्रदर्शित करण्यात आली. शनिवारवाडा आवारात लावण्यात आलेल्या आर्टिफिशियल ज्वेलरी, कलाकुसरीच्या वस्तूंच्या स्टॉलमधील बांगड्या, कानातील आभूषणांनी महिला प्रतिनिधींना आकर्षित केले.

रस्ते बंद झाले म्हणून गैरसोय :

परदेशी पाहुण्यांच्या ‘हेरिटेज वॉक’ साठी शनिवारवाडा, लाल महाल आणि नाना वाड्यात कोणताही अडथळा न येता पोचता यावे यासाठी शिवाजी रस्ता शनिवारवाड्यापासून दगडूशेठपर्यंत वाहतुकीसाठी काही काळ बंद करण्यात आला होता.

त्यामुळे त्यामुळे परिसरात मोठी वाहतूक कोंडी झाली होती. रस्ता देखील ओलांडता येत नसल्याने पादचाऱ्यांना गैरसोर्इचा सामना करावा लागला.