Pune Student Attack : 'मी कोयता वरच्या वर पकडला अन्..' वाचवणाऱ्या मुलाने सांगितला घटनेचा थरार

Pune Student Girl Attack : पुण्यातील सदाशिव पेठेत आज सकाळी एका तरूणीवर प्राणघातक हल्ला झाला आहे. एका तरूणाने कोयत्याने या तरूणीवर वार केले असून या घटनेचा व्हिडिओ सोशल मीडियावर व्हायरल झाला आहे. तर एका विद्यार्थ्याने या विद्यार्थिनीचा जीव वाचवण्यासाठी प्रयत्न केला आहे. त्याने घडलेला घटनेचा थरार सांगितला आहे.

"मी अभ्यासिकेत जात असताना मला हा तरूण तरूणीवर हल्ला करताना दिसला. मग तो तिच्या पाठीमागे पळत होता. ती पुढे जाऊन खाली बसली आणि मदतीसाठी हाक मारत होती पण कुणीच तिच्या मदतीला आलं नाही.

तो तिच्यावर वार करणार तेवढ्यात मी त्याचा कोयता वरच्या वर पकडला आणि बॅग त्याच्या अंगावर फेकली. त्यानंतर माझ्या मदतीला एकजण आला आणि आम्ही दोघांनी पकडून त्याला पोलीस स्टेशनमध्ये नेलं" असं सदर विद्यार्थ्याने सांगितलं आहे.

दरम्यान, "दर्शना पवार या तरूणीची हत्या झाल्याची घटना होऊन एक आठवडासुद्धा झाला नसताना अशा घटना आज पुण्यातील मध्यवर्ती भागात घडत आहेत आणि मुलींना वाचवण्यासाठी कुणीच समोर येत नाही, अशा समाजाची मला लाज वाटते" अशी संतप्त प्रतिक्रिया या तरूणाने दिली आहे.