Nitin Gadkari : नितीन गडकरी शनिवारी एक दिवसाच्या बारामती दौ-यावर

बारामती - अँग्रिकल्चरल डेव्हलपमेंट ट्रस्टच्या सेंटर ऑफ एक्सलन्स डेअरी प्रकल्पाच्या उदघाटनासह विद्या प्रतिष्ठानच्या सेंटर ऑफ एक्सलन्स फॉर युथ डेव्हलपमेंट प्रयोगशाळेच्या उदघाटनासाठी केंद्रीय रस्ते वाहतूक मंत्री नितीन गडकरी शनिवारी (ता. 11) बारामतीत येत आहेत.

ज्येष्ठ नेते शरद पवार, विरोधी पक्षनेते अजित पवार, खासदार सुप्रिया सुळे, आमदार रोहित पवार आदी मान्यवर नितीन गडकरी यांच्यासमवेत असतील. दुपारी साडेबारा वाजता सेंटर ऑफ एक्सलेन्सचे उदघाटन करुन डेअरी प्रकल्पास ते भेट देतील. दुपारी सव्वा दोन वाजता इनक्युबेशन सेंटर येथे नवउद्योजकांशी ते चर्चा करणार आहेत, त्या नंतर कृषी विज्ञान केंद्र व राजीव गांधी सायन्स सेंटरला ते भेट देणार आहेत.

दुपारी सव्वातीन वाजता अप्पासाहेब पवार सभागृहात होणा-या कार्यक्रमास ते उपस्थित राहतील. या वेळी फेलोशिप पुरस्कारांचे वितरण केले जाणार आहे. दुपारी सव्वा चार वाजता विद्या प्रतिष्ठान संकुलास गडकरी भेट देणार असून सेंटर ऑफ एक्सलेन्स फॉर युथ डेव्हलपमेंटच्या प्रयोगशाळेचे उदघाटन त्यांच्या हस्ते होईल. सव्वा पाच वाजता बारामती विमानतळावरुन ते प्रयाण करणार आहेत.