'या' २० मार्गांवर बस सुरू करता येईल; पीएमपीचा महापालिकेसमोर प्रस्ताव!

पुणे : पुणे शहरात सकाळी 8 ते दुपारी 12 आणि सायंकाळी 4 ते रात्री 8 दरम्यान बससेवा सुरू करावी, असा प्रस्ताव पीएमपीचे संचालक आणि नगरसेवक शंकर पवार यांनी महापालिका आयुक्त शेखर गायकवाड यांना सादर केला आहे. प्रतिबंधित क्षेत्र आणि शहराचा मध्य भाग सोडून उर्वरित शहरात सुमारे 20 मार्गांवर 95 बसच्या माध्यमातून बससेवा सुरू करता येईल, असे प्रस्तावात म्हटले आहे.

शहरात एक जूनपासून लॉकडाउनमध्ये शिथिलता आली आहे. दुकाने, उद्याने काही प्रमाणात सुरू झाली आहे. विमान आणि रेल्वेसेवा सुरू झाल्यामुळे शहरातील वाहतूक व्यवस्थाही पूर्ववत होत आहे. रिक्षा आणि कॅबलाही काही प्रमाणात वाहतूक सुरू करण्यास परवानगी देण्यात आली आहे. खासगी आणि शासकीय कार्यालयेही सुरू झाली आहेत. त्यामुळे शहरात नागरिकांची वर्दळ वाढू लागली आहे.

- इंजिनिअर तरुणाने शेतीचा नाद केला, लॉकडाउनमध्ये कमावले 13 लाख

सध्या खासगी वाहनांच्या वाहतुकीला परवानगी देण्यात आली आहे. मात्र, ज्या नागरिकांकडे खासगी वाहने नाहीत, विशेषतः कष्टकऱ्यांची गैरसोय होऊ लागली आहे. त्यांना कामावर जाण्यासही अडचण येऊ लागली आहे. त्यामुळे कोरोनाचे प्रतिबंधित क्षेत्र आणि मध्य भागातील पेठांचा भाग सोडून पीएमपीची सेवा ठराविक वेळेत सुरू करावी, असे पवार यांनी महापालिकेला सादर केलेल्या प्रस्तावात म्हटले आहे. शहरातील प्रमुख रस्ते, उपनगरे येथे पीएमपीची शटल सेवा सुरू करता येईल. त्यासाठी सोशल डिस्टन्सिंगच्या नियमांचेही पालन करण्यात येऊ शकेल. बसमध्ये सध्या त्यासाठी मार्किंग करण्यात आले आहे, असेही त्यांत नमूद केले आहे.

- 'आमची परीक्षा घेण्याची तयारी, पण...'; शिक्षण संस्थांनी भूमिका केली स्पष्ट!

स्वारगेटवरून निगडी, कात्रज, धनकवडी, भारती विद्यापीठ, अप्पर इंदिरानगर, धायरी आणि हडपसर, महापालिक भवनवरून लोहगाव, म्हाळुंगे, बालेवाडी, पाषाण, बावधन, चिंचवडगाव, माळवाडी, कोथरूड, पुणे स्टेशनवरून हडपसर, वाघोली, विश्रांतवाडी, कोंढवा खुर्द, हडपसर ते खराडी बायपास आदी 20 मार्गांवर बससेवा सुरू करता येईल, असेही प्रस्तावात म्हटले आहे. यासाठी स्वारगेट, नरवीर तानाजी वाडी, कोथरूड, कात्रज, मार्केटयार्ड, हडपसर, पुणे स्टेशन आणि बालेवाडी आगारांतील बस वापरता येतील. सुमारे 15 ते 30 मिनिटांच्या वारंवारितेनुसार या बस उपलब्ध करून देता येतील, असेही पवार यांनी प्रस्तावात म्हटले आहे.

- पन्नास जणांच्या उपस्थितीत आषाढी पालखी प्रस्थान सोहळा

या बाबत पवार म्हणाले, ''शहरातील बससेवा सुरू करण्यासाठी महापालिका आयुक्त शेखर गायकवाड यांना प्रस्ताव सादर करण्यात आला आहे. तसेच पुणे आणि पिंपरी चिंचवड, अशी बससेवा सुरू करण्यासाठी पिंपरी चिंचवडचे महापालिका आयुक्त श्रावण हर्डीकर यांनाही प्रस्ताव दिला आहे. शहरातील सर्वच वाहतूक सुरू झालेली असताना, पीएमपी बंद ठेवणे योग्य नाही. ज्यांच्याकडे स्वतःची वाहने नाहीत, अशा नागरिकांची गैरसोय होत आहे. त्यामुळे सोशल डिस्टन्सिंगच्या नियमांची अंमलबजावणी सुरू करून पीएमपीची वाहतूक सुरू ठेवता येईल.''

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे  क्लिक करा