आळंदी, चाकणच्या मुख्याधिकाऱ्यांची बदली

आळंदी, ता. १९ : विकासात्मक दृष्टिकोन ठेवून काम करणाऱ्या आळंदी नगरपरिषदेचे मुख्याधिकारी कैलास केंद्रे यांची पदोन्नतीद्वारे बदली झाली. त्यांची नियुक्ती लातुर महानगरपालिकेत उपायुक्त म्हणून झाली, तर त्यांच्या जागी आळंदी नगरपरिषदेच्या मुख्याधिकारीपदी नातेपुते नगरपंचायतीचे मुख्याधिकारी माधव खांडेकर यांची नेमणूक केली आहे. तसेच, चाकण नगरपरिषदेचे मुख्याधिकारी चंद्रकांत भोसले यांची बदली विभागीय आयुक्त कार्यालयात सहायक आयुक्त म्हणून झाली असून, त्यांच्या जागी नवी मुंबईतील सहायक आयुक्त अंकुश जाधव यांची करण्यात आली आहे. याबाबतचा आदेश गुरुवारी (ता. १९) मंत्रालयातून नगरविकास विभागातील उपसचिव प्रियांका कुलकर्णी छापवाले यांनी काढला आहे.
आळंदी नगरपरिषदेचे मुख्याधिकारी केंद्रे यांच्या बदलीबाबतची चर्चा मागील एक महिन्यांपासून सुरू होती. मागील दोन वर्षे त्यांनी आळंदीत विकासात्मक दृष्टिकोन ठेवून अनेक कामे केली. यामध्ये मुख्यत्वेकरून रस्ते, गार्डन, चौक सुशोभीकरणाची उल्लेखनीय कामे केली. मात्र, पाणीपुरवठ्याबाबत त्यांना अपयश आले. त्यामुळे नातेपुते नगरपंचायतीमधून बदली होऊन येणाऱ्या खांडेकर यांच्यावर मुख्यत्वेकरून दैनंदिन पाणीपुरवठा करण्याचे मोठे आव्हान असणार आहे.
चाकण नगरपरिषद मुख्याधिकारी भोसले हेही नुकतेच रुजू झाले होते. जेमतेम कालावधी मिळाला तरी त्यांचीही कामगिरी चांगली राहिली आहे. त्यांच्या जागी नवी मुंबईतील सहायक आयुक्त अंकुश जाधव यांची नेमणूक झाली आहे. त्यांनी आळंदी नगरपरिषद व पिंपरी महापालिकेतही काम केले आहे.