बारामतीतील १५१२ विद्यार्थ्यांना आज मिळणार विनामूल्य चष्मे

बारामती, ता. १२ : तालुक्यातील शासकीय, जिल्हा परिषद, खासगी संस्थांमधील पाचवी ते दहावीच्या सर्व विद्यार्थ्यांची नेत्रतपासणी करण्यात आली. मुंबई येथील रत्ननिधी चॅरिटेबल ट्रस्ट, एस्सिलॉर ग्रुप, बारामती पंचायत समिती आरोग्य व शिक्षण विभागाच्या वतीने नेत्रतपासणी शिबिरांचे आयोजन केले होते.
बालवयातील मुलांमधील दृष्टिदोष दूर करणे, त्यांच्या डोळ्यांचे आरोग्य जपण्याच्या दृष्टीने या उपक्रमाचे विनामूल्य आयोजन केले होते. प्रत्यक्ष शाळेत जाऊन प्रत्येक मुलाच्या डोळ्यांची तपासणी केली. या उपक्रमामध्ये १० तज्ज्ञांच्या मदतीने बारामती तालुक्यातील १५६ शाळांमधील पाचवी ते दहावीपर्यंतच्या ३० हजार ४२७ विद्यार्थ्यांची नेत्रतपासणी केली. या तपासणीमध्ये १५१२ विद्यार्थ्यांना चष्म्याची आवश्यकता होती. वेळेवर तपासणी झाल्यामुळे त्यांच्या डोळ्यांचे आयुष्य अधिक वृद्धिंगत होण्यास मदत होणार असल्याची माहिती तालुका आरोग्य अधिकारी डॉ. मनोज खोमणे यांनी दिली.
उपमुख्यमंत्री अजित पवार यांनी या उपक्रमासाठी सूचना केल्या होत्या, त्यानुसार डॉ. संतोष भोसले व ट्रस्टचे प्रमुख राजीव मेहता यांनी पुढाकार घेत बारामती तालुक्यात हा उपक्रम राबविला. विद्यार्थ्यांना ट्रस्टच्या वतीने विनामूल्य चष्म्यांचे वाटप केले जाणार आहे. रविवारी (ता. १३) उपमुख्यमंत्री अजित पवार यांच्या उपस्थितीत या चष्म्यांचे सकाळी साडेदहा वाजता बारामती पंचायत समितीमध्ये वाटप होणार आहे.