येरवडा कारागृहात कैद्यावर फरशीने हल्ला
पुणे, ता. १६ : येरवडा कारागृहातील बराकीत झालेल्या वादातून दोन कैद्यांनी दुसऱ्या कैद्यावर फरशीने हल्ला केला. कैद्याच्या डोक्यात व कमरेवर फरशीने वार करत खुनाचा प्रयत्न केला. याप्रकरणी दोघांवर गुन्हा दाखल केला आहे. ही घटना सोमवारी सायंकाळी पावणेसातच्या सुमारास घडली. यामध्ये गंभीर जखमी झालेल्या कैद्यावर ससून रुग्णालयात उपचार सुरू आहेत.
विशाल नागनाथ कांबळे (वय २८, रा. लक्ष्मीनगर, येरवडा) असे हल्ल्यात जखमी झालेल्या कैद्याचे नाव आहे, तर त्यावर हल्ला केल्याप्रकरणी आकाश सतीश चंडालिया (वय ३०, रा. जय जवाननगर, येरवडा) व दीपक संजय रेड्डी (वय २७, रा. इंद्रायणी कॉलनी, कामशेत) यांच्याविरुद्ध येरवडा पोलिस ठाण्यात खुनाचा प्रयत्न केल्याचा गुन्हा दाखल केला आहे. याबाबत कारागृह अधिकारी सचिन गुरव यांनी येरवडा पोलिस ठाण्यात फिर्याद दिली आहे.
चंडालिया, रेड्डी, कांबळे हे सराईत गुन्हेगार आहेत. तिघांना सी. जे. विभागातील बराक क्रमांक एकमध्ये ठेवले आहे. कांबळे हा दोन महिन्यांपासून चंडालिया व रेड्डी यांना शिवीगाळ व मानसिक त्रास देत असल्याच्या कारणावरून त्यांनी हल्ला केल्याची माहिती येरवडा पोलिसांनी दिली. या घटनेची माहिती मिळताच येरवडा विभागाच्या सहाय्यक पोलिस आयुक्त प्रांजली सोनवणे, वरिष्ठ पोलिस निरीक्षक अंजुम बागवान यांनी घटनास्थळी भेट दिली. सहाय्यक निरीक्षक प्रसन्न जऱ्हाड तपास करत आहेत.
नवीन कात्रज बोगद्यात
दुचाकी घसरून युवकाचा मृत्यू
पुणे, ता. १६ : वाहतुकीच्या नियमांकडे दुर्लक्ष केल्याने दुचाकी घसरून सहप्रवासी युवकाचा मृत्यू झाला. ही घटना मुंबई-बंगळूर बाह्यवळण मार्गावरील नवीन कात्रज बोगद्यात २७ ऑक्टोबरला घडली. यामध्ये दुचाकीचालक तरुण जखमी झाला. याप्रकरणी मृत्यू झालेल्या युवकाच्या आईच्या तक्रारीवरून आंबेगाव पोलिसांनी दुचाकीस्वारावर गुन्हा दाखल केला आहे.
या अपघातात चेतन मधुकर मोरे (वय १७, रा. गणेश चौक, आंबेगाव पठार, धनकवडी) याचा मृत्यू झाला असून, दुचाकीस्वार कृष्णा तानाजी मादगुडे (वय १८, रा. तांबाड, ता. भोर) हा जखमी झाला. याबाबत चेतनची आई मंगल (वय ३६) यांनी आंबेगाव पोलिस ठाण्यात फिर्याद दिली आहे. कृष्णा व चेतन हे २७ ऑक्टोबरला दुपारी नवीन कात्रज बोगद्यातून जात असताना त्यांची दुचाकी घसरली. यामध्ये चेतन गंभीर जखमी झाला अन् त्याचा उपचारादरम्यान मृत्यू झाला. पोलिस उपनिरीक्षक युवराज शिंदे तपास करत आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.