Layoffs: MS धोनीची गुंतवणूक असलेल्या कंपनीने केली कर्मचारी कपात, काय आहे कारण?

Khatabook Layoffs: मोठ्या कंपन्यांमध्ये नोकर कपातीची प्रक्रिया सुरू आहे. भारतातही अनेक क्षेत्रातील कंपन्यांमध्ये सातत्याने कर्मचारी कपात होत आहे. आता आणखी एका फिनटेक स्टार्टअप कंपनीने कर्मचारी कपात केली आहे. या कंपनीत भारतीय क्रिकेट संघाचा माजी कर्णधार महेंद्रसिंग धोनीचीही गुंतवणूक आहे.

बेंगळुरू स्थित फिनटेक कंपनी Khatabook ने अनेक कर्मचाऱ्यांना बाहेरचा रस्ता दाखवला आहे. बिझनेस टुडेच्या वृत्तानुसार, कंपनीच्या अभियांत्रिकी, उत्पादन आणि विपणन विभागातील कर्मचाऱ्यांची कपात केली आहे.

अहवालानुसार, खाताबुकने कपात केलेल्या कर्मचाऱ्यांनाही काही प्रमाणात दिलासा देण्याचा प्रयत्न केला आहे. काढून टाकलेल्या कर्मचाऱ्यांना कंपनीने तीन महिन्यांचा पगार दिला आहे. याशिवाय कंपनीने इन्शुरन्समध्येही मुदतवाढ दिली आहे. या प्रकरणाशी संबंधित लोकांचे म्हणणे आहे की फिनटेक कंपनी खर्च कमी करण्याचा प्रयत्न करत आहे.

कंपनीने ही माहिती दिली

खाताबुक कंपनीने सांगितले की एकूण कर्मचाऱ्यांपैकी 6 टक्के कर्मचाऱ्यांना कामावरून कमी करण्यात येत आहे. कपात झालेल्या सर्व कर्मचाऱ्यांना मदत पॅकेज देण्यात येणार आहे. कंपनीने ही कर्मचारी कपात खर्च कमी करण्यासाठी केली आहे असे सांगितले आहे.

कंपनीत महेंद्रसिंग धोनीचीही गुंतवणूक

Khatabook ही एक फिनटेक स्टार्टअप कंपनी आहे, जी अॅपद्वारे कर्ज देण्याची सुविधा देते. कंपनीची स्थापना वैभव काळपे यांनी केली होती. नंतर 2018 मध्ये, Kite Technologies ने Khatabook विकत घेतले.

भारताचा माजी कर्णधार महेंद्रसिंग धोनी खाताबुकचा ब्रँड अॅम्बेसेडर आहे. खाताबुकने सांगितले होते की एमएस धोनीनेही कंपनीत गुंतवणूक केली आहे. मात्र, गुंतवणुकीची नेमकी रक्कम कंपनीने सांगितलेली नाही.