Adani Group: गौतम अदानी आणखी एक कंपनी घेणार विकत? 'या' कंपनीशी चर्चा सुरु

CK Birla Group and Adani Group: बिर्ला समूहाने ओरिएंट कंपनीचा हिस्सा विकण्यासाठी अदानी समूहाशी चर्चा करत आहे. ही बातमी येताच ओरिएंट सिमेंटच्या शेअर्समध्ये तेजी दिसून आली. ओरिएंट सिमेंटमधील हिस्सा विकण्यासाठी अनेक व्यावसायिकांशी चर्चा झाली होती.

कंपनीत सीके बिर्ला यांची हिस्सेदारी 37.9 टक्के आहे. ज्याचे बाजारमूल्य 3,878 कोटी रुपये आहे. यापूर्वी बिर्ला जेपी मॉर्गन यांच्याशीही चर्चा करत होती.

बिर्ला आणि अदानी समूहाच्या वरिष्ठ व्यवस्थापन अधिकाऱ्यांनी संभाव्य करारावर चर्चा करण्यासाठी भेट घेतली, असे वृत्त इकॉनॉमिक टाइम्सने सूत्रांच्या हवाल्याने दिले आहे. रिपोर्टनुसार, गेल्या काही महिन्यांपासून अदानीसोबत चर्चा सुरू होती.

सिमेंट व्यवसायात अदानी समूहाचा दबदबा

अदानी समूहाच्या अदानी सिमेंट या कंपनीने नुकतेच सांघी इंडस्ट्रीजचे अधिग्रहण केले आहे. अदानी सिमेंटची एकूण सिमेंट क्षमता 110 दशलक्ष टन आहे. अदानी समूहाला व्यवसाय वाढवण्यासाठी हा करार महत्त्वाचा ठरू शकतो.

सीके बिर्ला समूह हा ऑटो अॅक्सेसरीज उत्पादने, इमारत बांधकाम उत्पादने, अभियांत्रिकी उत्पादने, सिमेंट, कागद, पंखे आणि इलेक्ट्रिकल वस्तू यांसारख्या विविध उद्योगांमध्ये पसरलेला आहे.

बिर्ला समूह जवळपास चार दशकांपासून सिमेंटचा व्यवसाय करत आहेत. ओरिएंट सिमेंटची प्रमुख बाजारपेठ महाराष्ट्र, तेलंगणा, कर्नाटक आणि मध्य प्रदेश आहे. कंपनीची गुजरातमध्येही कंपनीच्या शाखा आहेत .