ICC World Cup 2023: वर्ल्डकप करणार मालामाल! 'या' कंपनीचा शेअर पाडणार पैशांचा पाऊस, तुमच्याकडे आहे का?

Lemon Tree Hotel Share: चार वर्षांतून एकदा होणारा आयसीसी एकदिवसीय क्रिकेट वर्ल्ड कप 5 ऑक्टोबरपासून सुरू झाला आहे. यंदाचा वर्ल्ड कप भारतात होत असून, त्यातील अंतिम सामना 19 नोव्हेंबरला होणार आहे. वर्ल्डकपमधील पहिला आणि शेवटचा सामना अहमदाबादच्या नरेंद्र मोदी स्टेडियमवर होणार आहे.

हा वर्ल्ड कप देशाच्या अर्थव्यवस्थेसाठी फायद्याचा ठरणार आहे. फेस्टिव्ह सीझन आणि क्रिकेट वर्ल्ड कपमुळे अनेक कंपन्यांची कमाई वाढू शकते. लेमन ट्री हॉटेल्स ही त्यापैकीच एक कंपनी. गेल्या 6 महिन्यांत कंपनीच्या शेअरच्या किंमतीत 50 टक्क्यांहून अधिक वाढ झाली आहे.

क्रिकेट वर्ल्ड कपमुळे हॉटेल व्यवसायाला अधिक फायदा होण्याची अपेक्षा आहे. लेमन ट्री हॉटेल्सनाही या वर्ल्ड कपकडून मोठ्या अपेक्षा आहेत. कंपनीची विविध शहरांमध्ये अनेक हॉटेल्स आहेत. अशा स्थितीत कंपनी या काळात चांगली कमाई करू शकते. या शेअरबद्दल तज्ज्ञ ही आशावादी आहे.

140 रुपयांपर्यंत भाव जाणार असल्याचा तज्ज्ञांना विश्वास

बिझनेस टुडेच्या वृत्तानुसार, हेमांग जानी म्हणाल्या की, लेमन ट्री हॉटेल्सचे शेअर्स येत्या काळात 140 रुपयांपर्यंत जाऊ शकतात. 2023 मध्ये या शेअर्सची किंमती 52 टक्क्यांनी वाढल्या आहेत. त्याच वेळी, ज्या गुंतवणूकदारांनी सहा महिन्यांपूर्वी हा शेअर विकत घेतला आहे त्यांनी आतापर्यंत 52 टक्के नफा कमावला आहे.

लेमन ट्री हॉटेल्सचा 52 आठवड्यांचा उच्च दर 126.70 रुपये आहे. आणि 52 आठवड्यांचा नीचांक प्रति शेअर 70.25 रुपये आहे. कंपनीचे मार्केट कॅप 9411.89 कोटी रुपये आहे. शुक्रवारी लेमन ट्री हॉटेल्सचा शेअर 0.76 टक्क्यांच्या वाढीसह 118.80 रुपयांच्या पातळीवर बंद झाला.

नोंद: क्रिप्टो मार्केट, शेअर मार्केट किंवा म्युच्युअल फंडातील गुंतवणुकीत जोखीम असते. यामध्ये फायद्याप्रमाणे नुकसान होण्याचीही शक्यता असते. त्यामुळे क्रिप्टो, शेअर बाजार किंवा म्युच्युअल फंडातील कोणतीही गुंतवणूक करण्याआधी आपल्या वित्तीय सल्लागारासोबत चर्चा करूनच गुंतवणूक करा.