Share Market Closing: शेअर बाजारातील 2 दिवसांच्या तेजीला ब्रेक; गुंतवणूकदारांचे 46,000 कोटी रुपयांचे नुकसान

Share Market Closing Latest Update 17 August 2023: कमकुवत जागतिक संकेतांमुळे बाजारातील प्रमुख निर्देशांक घसरणीसह बंद झाले. BSE सेन्सेक्स 388 अंकांनी घसरून 65,151 वर बंद झाला. निफ्टीही 100 अंकांची घसरणीसह 19,365 वर बंद झाला आहे.

एफएमसीजी क्षेत्रात मोठी घसरण

एफएमसीजी क्षेत्राला बाजारातील वेगवान विक्रीचा फटका बसला. ITC शेअर 2% घसरून बंद झाला. तर टायटनचा शेअर सर्वाधिक वाढला. याआधी बुधवारी भारतीय बाजारात किंचित वाढ नोंदवण्यात आली होती.

बाजारातील घसरणीची कारणे

• FED मध्ये व्याजदर वाढीचे संकेत

• अमेरिका, युरोपसह आशियाई बाजारात विक्री

• डॉलरच्या तुलनेत रुपयाची घसरण

• हेवीवेट शेअर्समध्ये मोठी घसरण

क्षेत्रीय निर्देशांकांची स्थिती

आजच्या व्यवहारात एफएमसीजी, बँकिंग, आयटी, एनर्जी, फार्मा, इन्फ्रा, हेल्थकेअर, तेल आणि वायू क्षेत्रातील शेअर्स घसरले. वाहन क्षेत्रातही घसरण झाली आहे. केवळ ग्राहकोपयोगी वस्तू क्षेत्रातील शेअर्समध्ये तेजी आली.

मिड कॅप आणि स्मॉल कॅप शेअर्सची गती कायम आहे. सेन्सेक्समधील 30 शेअर्सपैकी केवळ 8 शेअर्स वाढीसह बंद झाले तर 22 शेअर्स घसरले. तर निफ्टीच्या 50 शेअर्सपैकी 17 शेअर्स वाढले तर 33 शेअर्स घसरणीसह बंद झाले.

गुंतवणूकदारांच्या संपत्तीत घट

आजच्या व्यवहारात बाजारातील गुंतवणूकदारांच्या संपत्तीत घसरण झाली आहे. बीएसईवर सूचीबद्ध कंपन्यांचे मार्केट कॅप 303.90 लाख कोटी रुपयांवर आले, जे मागील सत्रात 304.36 लाख कोटी रुपये होते. म्हणजेच आजच्या व्यवहारात गुंतवणूकदारांचे 46,000 कोटी रुपयांचे नुकसान झाले आहे.

सेन्सेक्सवर 'या' शेअर्समध्ये घसरण:

BSE सेन्सेक्सवर ITC चा शेअर सर्वाधिक 2.04 टक्क्यांच्या घसरणीसह बंद झाला. त्याचप्रमाणे पॉवरग्रीड, रिलायन्स इंडस्ट्रीज, लार्सन अँड टुब्रो, नेस्ले इंडिया, कोटक महिंद्रा बँक, बजाज फायनान्स, जेएसडब्ल्यू स्टील स्टील, टाटा मोटर्स, एनटीपीसी, अल्ट्राटेक सिमेंट, आयसीआयसीआय बँक, एचडीएफसी बँक, इन्फोसिस, इंडसइंड बँक, टीसीएस आणि एचयूएलचे शेअर्स घसरणीसह बंद झाले.

सेन्सेक्सवर 'या' शेअर्समध्ये तेजी

टायटनचा शेअर सेन्सेक्समध्ये सर्वाधिक 2.12 टक्क्यांच्या वाढीसह बंद झाला. त्याचप्रमाणे एसबीआय, बजाज फिनसर्व्ह, अॅक्सिस बँक, टाटा स्टील आणि सन फार्मा यांचे शेअर्स वाढीसह बंद झाले.