Share Market Closing: सलग दुसऱ्या दिवशी शेअर बाजारात तेजी; सेन्सेक्समध्ये 234 अंकांची वाढ, 'या' शेअर्समध्ये...

Share Market Closing 22 May 2023: आठवड्याच्या पहिल्या दिवशी शेअर बाजारात तेजी दिसून आली. BSE सेन्सेक्स 234 अंकांनी वाढून 61,963 वर बंद झाला. त्याचप्रमाणे निफ्टीही 111 अंकांनी वाढून 18,314 वर बंद झाला आहे.

बाजाराने आज सलग दुसऱ्या दिवशी वाढ नोंदवली. बाजारातील सोमवारच्या तेजीत आयटी आणि मेटल क्षेत्रातील शेअर्स आघाडीवर होते.

आयटी-मेटल शेअर्समध्ये वाढ:

NSE वरील निफ्टी आयटी आणि मेटल निर्देशांक 2-2 टक्क्यांहून अधिक तेजीसह बंद झाले आहेत. निफ्टीमध्ये अदानी समूहाच्या शेअर्समध्ये जोरदार खरेदी झाली.

अदानी एंटरप्रायझेसच्या शेअरमध्ये जवळपास 20 टक्क्यांनी वाढ झाली आहे. तर अदानी पोर्ट्सचा स्टॉक 6.4 टक्क्यांनी वाढून बंद झाला. तर हिरो मोटोकॉर्पचा शेअर सर्वाधिक घसरला आहे.

याआधी शुक्रवारी भारतीय बाजारात 3 दिवसांनंतर तेजीची नोंद झाली होती. BSE सेन्सेक्स सुमारे 300 अंकांच्या वाढीसह 61,729 वर बंद झाला आणि निफ्टी 73 अंकांनी चढून 18,200 च्या वर बंद झाला.

आयटी कंपन्यांमध्ये वाढ:

आज देशांतर्गत बाजारपेठेच्या वाढीमध्ये आयटी कंपन्यांचा सर्वात मोठा वाटा आहे. BSE सेन्सेक्स निर्देशांकातील आजच्या टॉप-5 परफॉर्मर कंपन्या या क्षेत्रातील होत्या.

टेक महिंद्रा सर्वाधिक 3.13 टक्क्यांनी वाढले, तर विप्रो 2.59 टक्के, इन्फोसिस 2.16 टक्के, टीसीएस 2.12 टक्के आणि एचसीएल टेक 1.73 टक्क्यांनी वाढले.

सेन्सेक्समधील 30 कंपन्यांपैकी 11 कंपन्यांच्या शेअर्समध्ये घसरण झाली, तर 19 कंपन्यांचे शेअर्स तेजीसह बंद झाले.

इतर काही घटकांमुळे बाजारातील तेजी कमी झाली. भारतीय चलन रुपयात आज सलग चौथ्या दिवशी घसरण झाली. डॉलर कमजोर झाल्यानंतर रुपया घसरला आहे. याचा देशांतर्गत बाजारावर नकारात्मक परिणाम झाला. आज डॉलरच्या तुलनेत रुपया 16 पैशांनी घसरून 82.82 वर बंद झाला.