ढिंग टांग : येरझाराचे अभंग!

अगा विश्वेश्वरा। नको पाहू अंत।

सर्व साधुसंत। आतुरले।।

उघडा ते द्वार। घ्यावे मज पायी।

थकली ही ध्याई। प्रतीक्षेत।।

किती काळ घेसी। घेसी कोंडोनिया।

काही दयामाया। नाही कां रे?।।

किती दिस झाले। झाले वर्ष, मास।

दर्शनाची आस । लागलेली।।

चंद्रभागातीर। पडियेला ओस।

भजनाचा सोस । नुरला गा ।।

ऐसे कैसे बंद । विठो तुझे गांव ।

कायें भक्तिभाव । रोखियेला?।।

भवताप कोणा। नाही गा चुकला।

प्रपंचाचा काला। सर्वांसाठी।।

जमवुनी काडी। किडूक मिडूक।

संसार खुडूक। रेटला गा।।

दीड वीत विश्व। आमुचे गा राया।

सारी मोहमाया। भुकेसाठी।।

रंजलो गांजलो। धडलो पडलो।

चित्ती गा धरिलो। तुझे रुप।।

शिंपितो शिवार। राखितो कौलार।

बाळगी लेंढार। प्रपंचात।।

खुंट्यासी बांधिले। दु:खाचे श्वापद।

सुखाचा उन्माद। विसरलो।।

कितीयेक गेले। कितीक खंगले।

किती उभे ठाले। रांगेमाजी।।

आता नुरे आम्हा। कळीकाळ भय।

ज्याचे जैसे होय। मान्य आहे।।

तरीही विठ्ठला। ओठी तुझे नाम।

आठवितो धाम। पंढरीचे।।

बरे केले देवा। केलो वारकरी।

काया नाहीतरी। वाया होती।।

म्हणोनिया देवा। जीव घेतो ओढ।

मनोवेगी दौड। मारितो गा।।

सोडवोनि गुंता। पायीचा गा पाश।

गाठावा सर्वेश। हेचि ध्यान।।

ऐसे घोकोनिया । उचलिले पाय ।

धावलो धाय धाय । तुझ्याकडे ।।

हाय देवा काय । आहे तुझ्या मनीं।

अर्ध्या रस्त्यातुनी । परतलो की।।

वैष्णवांचा जथा । अडियेला दारी ।

दर्शनासी भारी । उतावीळ ।।

देवा तुझी तरी । कवाडे का बंद ।

कैवल्याचा कंद । दुर्मिळची ।।

उघड रे देवा । उघड ना दार ।

फुका येरझार । थांबवी रे।।

मृत कुक्कुटासी। कसले गा भय ।

अग्नि आणि तोय । सारखेचि ।।