दादू : (अस्वस्थपणे फोन फिरवत) हलोऽऽ…मी दादू बोलतोय!
सदू : (खेळकरपणाने) आज मांजराचे आवाज नाही काढलेस ते? साधी डरकाळीही नाही!! एकदम ‘हलो’नं सुरवात केलीस! बरी आहे ना तब्बेत?
दादू : (गंभीरपणाने) बी सीरियस सदूऽऽ…तुझ्यात लहानपणापासून अजिबात सीरिअसपणा नाही!!
सदू : (गंभीर होत) पटपट बोल! मला वेळ नाहीए... माझ्या पक्षाचं इगतपुरीला शिबिर चालू आहे!!
दादू : (कुचकटपणाने) पंधरावीस लोक तर असतील!! फू:!!
सदू : (रागारागाने) दादूऽऽ... खामोश! मांडव भरलाय इथं!! येऊन बघ!! परवा वरळीच्या मेळाव्यात माझी ताकद बघितलीस ना? आता हिणवतोस? येत्या इलेक्शनसाठी आमच्याशी युती करा, असं सांगायला दाराशी रांग लागते माझ्या!!