आरक्षणासाठी शेळ्या, मेंढ्या, घोडी घेऊन धनगर समाज रस्त्यावर; पुणे-बंगलोर महामार्ग अडवला, आंदोलक आणि पोलिसांत झटापट

खंडाळा : सकल धनगर समाजाच्या वतीनं (Dhangar Community) आज पुणे-बंगलोर महामार्ग पारगाव-खंडाळा इथं रोखण्यात आला. यावेळी धनगर समाजानं मोठी घोषणाबाजी केली, तर महामार्गावरच गजीनृत्य सादर केले.

याप्रसंगी शेळ्या, मेंढ्या व घोडी घेऊन धनगर समाज रस्त्यावर उतरला होता. दरम्यान, पुणे व सातारा दोन्ही बाजूकडील महामार्ग साडेबारापासून बंद ठेवला आहे.

यावेळी पोलिसांनी सातारा बाजूकडील वाहने पंढरपूर फाटा शिरवळ येथे, तर पुण्याकडे जाणारी वाहने वेळे (ता. वाई) येथे अडविण्यात आले आहेत. साताऱ्याकडे जाणाऱ्या वाहनचालकांनी आपली वाहने लोणंद बाजूकडून वळविल्याने आंदोलकांनी तीव्र संताप व्यक्त केला.

याप्रसंगी पोलीस उपविभागीय राहूल धस, तहसीलदार अजित पाटील, शिरवळ-खंडाळा पोलीस निरीक्षक व पोलिसांनी चोख बंदोबस्त ठेवला होता. दरम्यान, तहसीलदार कार्यालय इथं एकत्र जमून यशवंतराव चव्हाण व डॉ. बाबासाहेब आंबेडकर स्मारकास अभिवादन करून हा मोर्चा पायी चालत महामार्गावर पोहचला. यावेळी धनगर बांधव मोठ्या संख्येने मोर्चात सहभागी झाले होते.

दरम्यान, महामार्ग अडविल्यानंतरही गाड्या पुण्याकडे सुरु झाल्यानंतर आंदोलकांनी महामार्गावर धिंगाणा घातला. यानंतर पोलीस आणि आंदोलकांमध्ये बाचाबाची झाली. डीवायएसपी यांनी यात लक्ष घातल्यामुळे आंदोलक शांत झाले आणि यानंतर पुण्याकडे वाहतूक सुरु केली.