नावाने राजे नसलो तरी जनतेच्या मनातील नक्कीच राजे आहोत - शशिकांत शिंदे

अलीकडेच झालेल्या जिल्हा मध्यवर्ती सहकारी बँकेच्या निवडणूकीनंतर राष्ट्रवादीचे आमदार शशिकांत शिंदे (Shashikant Shinde) विरुद्ध भाजप आमदार शिवेंद्रराजे भोसले (Shivendraraje Bhosale) यांच्यात चांगलाच कलगीतुरा रंगल्याचं दिसत आहेत. जावळी तालुक्यातील मोरखिंड येथील विविध विकासकामांच्या भूमिपूजन प्रसंगी शशिकांत शिंदे यांनी शिवेद्रराजेंवर सडकून टीका केली आहे. ''नावाने राजे नसलो तरी जनतेच्या मनातील आम्ही नक्कीच राजे आहोत'', असा खोचक टोला शशिकांत शिंदे यांनी शिवेंद्रसिंहराजेंना लगावला. (Shashikant Shinde Criticize Shivendraraje Bhosale)

सातारा जिल्ह्यातील राजकारण अलीकडे चांगलेच तापले आहे. खासदार उदयनराजे भोसले आणि आमदार शिवेंद्रराजे भोसले यांच्यात सतत आरोपाच्या प्रत्यारोपाच्या फैरी झडत असतानाच अलीकडे झालेल्या जिल्हा मध्यवर्ती सहकारी बँकेच्या निवडणूकीतील (DCC Bank Election) आपल्या पराभवासाठी शिवेंद्रराजे भोसले जबाबदार असल्याचे राष्ट्रवादीचे आमदार शशिकांत शिंदे यांनी म्हटले होतं. त्यानंतर सातत्याने हे दोघेही एकमेकांवर टीका करत आहेत. दरम्यान जावळी तालुक्यातील मोरखिंड येथील विविध विकासकामांचे भूमिपूजन प्रसंगी बोलताना शशिकांत शिंदे यांनी शिवेंद्रराजेंवर सडकून टीका केली. ''नावाने राजे नसलो तरी जनतेच्या मनातील आम्ही नक्कीच राजे आहोत'', असा खोचक टोलाही शशिकांत शिंदे यांनी शिवेंद्रसिंहराजेंना लगावला.

या कार्यक्रमात खासदार श्रीनिवास पाटील यांच्या फंडातून मोरघर येथे सभा मंडप , पंचायत समिती उपसभापती सौरभ शिंदे यांच्या फंडातून विठ्ठल रुक्मिणी मंदिर परिसरात काँक्रीटीकरण ,जिल्हा परिषद सदस्य दीपक पवार यांच्या फंडातून मोरखर स्मशानभूमी रस्त्यावरील पूल, ग्रामपंचायत नवीन इमारत, तसेच आमदार शशिकांत शिंदे यांच्या फंडातून मोरखिंड गटार व काँक्रीट करण आदी विविध विकासकामांचे भूमिपूजन यावेळी करण्यात आले. यावेळी सातारा जिल्हा परिषद सदस्य दिपक पवार, अमित कदम, माथाडी कामगार नेते सुरेश तात्या गायकवाड, अजित भोसले, तुषार सावंत, मोरघर सरपंच रंजना मोरे, उपसरपंच आशालता गायकवाड, प्रतापगड चे संचालक भानुदास गायकवाड, सुरेश गायकवाड, महागाव सोसायटी चेअरमन रमेश गायकवाड, राजेंद्र गायकवाड, निलेश गायकवाड, दत्त गायकवाड, चंद्रकांत गायकवाड यांच्यासह मोरखिंड ग्रामस्थ व मोरघर ग्रामस्थ मोठ्या संख्येने उपस्थित होते