इगतपुरीत ढगफुटीसदृश्य पाऊस; शेतकऱ्यांवर शेतीचे बांध फोडण्याची वेळ

इगतपुरी (जि.नाशिक) : इगतपुरी तालुक्यात परतीच्या पावसाने कहर केला असून (ता.१९) मध्यरात्री तर विजेच्या कडकडाटासह ढगफुटीसदृश्य पाऊस झाल्याने भातशेतीचे अतोनात नुकसान झाले. दरम्यान शेतांत तलावसदृश्य पाणी संचित झाल्याने शेतकऱ्यांना शेतीचे बांध फोडावे लागले.भाताची सोंगणी चालू असल्याने त्यात आता हे पावसाचे संकट अशी शेतकऱ्यांपुढे चिंता उभी ठाकली आहे.

भात पिके दोन तास पाण्याखाली
परतीचा पाऊस व भात पिकावरील रोगराई यामुळे शेतकरी बांधव हताश असताना आता तर पावसाने कहर केला.आज (ता.१९) मध्यरात्री पहाटेच्या सुमारास तर तब्बल दोन तास ढगफुटीचा पाऊस झाल्याने शेतकरी कमालीचा अस्वस्थ झाला. शेतांमध्ये, नाल्यांना मोठ्या प्रमाणात पाणी आले. त्यामुळे भात पिके दोन तास पाण्याखाली होते. सकाळी पावसाचा झालेला उद्रेक व भात पीके पाण्याखाली पाहून शेतकऱ्यांचे डोळे पाणावले.त्यामुळे भात पिके वाचविण्यासाठी शेतकऱयांनी शेतीचे बांध फोडून पाणी काढून दिले.
भातपिकांसह अन्य पिकांचेही मोठया प्रमाणात नुकसान झाल्याने सरकारने दखल घ्यावी व शेतकऱ्यांना दिलासा द्यावा. 

हेही वाचा > मध्यरात्रीस खेळ चाले! गायींना भुलीचे औषध देऊन तस्करी; महागड्या गाड्यांचा वापर 

एकीकडे पंचनामे होतात पण त्यानंतर काय? 

चार महिन्यापूर्वी सुनामी चक्रीवादळ आले. ग्रामीण भागात नुकसानही झाले पंचनामे झाले, तात्काळ कारवाईचे आदेश झाले, परंतु अद्यापही शासनाची मदत मिळाली नाही. केवळ पंचनामे आदेश कागदावरच असतात. पण प्रत्यक्षात शेतकऱ्यांच्या हाथी निराशाच असा सूर शेतकरी वर्गातून निघत आहे,
लोकप्रतिनिधी यांनीही शासन दरबारी पाठपुरावा करावा अशी मागणी शेतकरी वर्गाकडून करण्यात येत आहे.

हेही वाचा > क्रूर नियती! नवरात्रीच्या पहिल्याच दिवशी देवीभक्ताचा दुर्देवी अंत; कुटुंबियांचा आक्रोश

संपादन - ज्योती देवरे