नाशिक : पर्यावरणाचे रक्षण करणे सर्वांचीच जबाबदारी आहे. शासनही त्याबाबत आग्रही आहे. मात्र अशा परिस्थितीत पोलिस कल्याण निधींतर्गत साकारत असलेल्या शरणपूर रोडवरील नव्या पेट्रोलपंपासाठी पूर्ण वाढ झालेल्या झाडांचा बळी देण्यात आल्याने पर्यावरणप्रेमींमध्ये तीव्र संताप व्यक्त होत आहे. या संदर्भात चौकशी करता, वरिष्ठ आधिकाऱ्यांनी फक्त फांद्या तोडण्याचे निर्देश दिले असतांना प्रत्यक्षात घटनास्थळावर मात्र थेट काही झाडेच आडवी करण्यात आली.
पोलिसांच्या पेट्रालपंपासाठी शरणपूरला वृक्षांची कत्तल
सार्वजनिक क्षेत्रात इंडियन ऑइल्स, हिंदुस्थान पेट्रोलियम, भारत पेट्रोलियम या सरकारच्या मालकीच्या कंपन्यांसह रिलायन्स, इस्सार या इंधन कंपन्यांत सध्या नव्याने पेट्रोलपंप सुरू करण्याची जोरदार स्पर्धा आहे. पेट्रोल कंपन्यांतील तीव्र स्पर्धेमुळे वाढलेल्या मागणीच्या धर्तीवर शहराच्या चौकाचौकात नव्या पेट्रोलपंपांची सुरवात होत आहे. गंगापूर रोडवरील सरकारवाडा पोलिस ठाण्याशेजारील पोलिस वसाहतीच्या जागेशेजारी पेट्रोलपंप असून, तो पोलिस कल्याण निधी योजनेद्वारे चालविला जातो. हा पंप सुरू असतानाच शरणपूर रोडवरील पोलिस कवायत मैदानाच्या एका टोकाला नवा पेट्रोलपंप उभारण्याचे नियोजन सुरू आहे. नवीन पंप होण्यासाठी कोणाचेही दुमत नाही, परंतु त्यासाठी पूर्ण वाढ झालेल्या दोन-चार झाडांचा बळी देणे चुकीचे आहे, अशी पर्यावरणप्रेमींची तक्रार आहे.
शरणपूर रोड : सूचना होत्या फांद्या कापायच्या, प्रत्यक्ष कापली झाडे
शहरातील दिंडोरी रोड, पेठ रोड किंवा गंगापूर रोडवर रस्त्याच्या कायमच झाडांच्या कत्तलीचा मुद्दा वादात सापडला आहे. मोठ्या आस्थापनांसमोर झाडे कधी गायब होतात हे कळत नाही. काही ठिकाणी रातोरात झाडे गायब होतात, तर काही ठिकाणी भररस्त्यात मधोमध असलेली झाडे अपघातास कारणीभूत ठरूनही ती मात्र तोडली जात नाही. शहरात सामान्य नागरिकांनी एखादे झाड तोडले तर महापालिकेची यंत्रणा संबंधिताला हैराण करते. पण पोलिस किंवा इतर कुठल्या मोठ्या यंत्रणेकडून वृक्ष तोडले गेल तर मात्र महापालिका यंत्रणा आणि त्यातील पर्यावरण विभाग मौनात असतो. एकूणच प्रशासकीय यंत्रणेचे पर्यावरणप्रेम कायमच सोयीनुसार पाहायला मिळते. शरणपूर रोड भागातील वृक्षतोडीबाबत अशाच तक्रारी आहेत. वरिष्ठ पोलिस अधिकाऱ्यांनी फांद्या तोडायला लावल्या असताना प्रत्यक्ष जागेवर मात्र थेट झाडांवरच कुऱ्हाड चालली.
पेट्रोलपंपासाठी या जागेतील झाडांची केवळ छाटणी करण्यास सांगण्यात आले होते. त्यामुळे पोलिस यंत्रणेकडून कुठलीही झाड तोडलेली नाही. महावितरण तर्फेही वृक्ष तोड सुरु होती. त्यांच्याकडून झाड तोडली गेली असावीत. मी प्रत्यक्ष भेट दिली असून माहिती घेत आहोत. -पूर्णिमा चौघुले-श्रींगी, पोलिस उपायुक्त
पेट्रोलपंप ही काळाची गरज असली तरी नैसर्गिक साधनसामग्री वाचविणे आपली जबाबदारी आहे. एकीकडे ऑक्सिजनचा तुटवडा जाणवू लागला असताना विकासाच्या नावाखाली झाडांची कत्तल दुर्दैवी आहे. -निशिकांत पगारे, पर्यावरणप्रेमी
संपादन - ज्योती देवरे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.