तळोद्यात धनादेश अनादर प्रकरणी 2 लाखाचा दंड

आमलाड : तळोदा येथील फौजदारी न्यायालयाने धनादेश अनादर प्रकरणी एकास दोन लाख रुपये दंड व १ महिन्याची साध्या कैदेची शिक्षा नुकतीच ठोठावली.

रामचंद्र शंभू चौधरी (रा.तळोदा ) यांना वाहिद उर्फ वायद दादामिया पठाण (रा.तळोदा ) याने आपसातील हातउसनवारीतील व्यवहारापोटी एक लाख पन्नास हजार रुपयेचा मोती अर्बन बँक शाखा तळोदाचा धनादेश तारखेस खात्यात रक्कम शिल्लक न ठेवल्याने धनादेश अनादर प्रकरणी फौजदारी दावा रामचंद्र शंभू चौधरी यांनी दाखल केला होता. धनादेश अनादर नंतर ही धनादेश रक्कम न आणून दिल्याने व ही बाब पुराव्यानिशी न्यायालयात सिद्ध झाल्याने वाहिद उर्फ वायद दादामिया पठाण याला २ लाख रुपये दंड व १ महिन्याची साधी कैद व रक्कम न दिल्यास १ वर्षाची कैद अशी शिक्षा न्यायमूर्ती एस. डी. हरगुडे यांनी ठोठावली. फिर्यादी रामचंद्र शंभू चौधरी यांचे तर्फे ॲड. संजय पुराणिक, व ॲड. संदीप पवार यांनी बाजू मांडली.