Dhule Crime News : नाकाबंदीत गांजासह दोघे अटकेत; जिल्ह्यात 63 हजारांचा दंड वसूल

Dhule Crime News : जिल्हा पोलिस अधीक्षक श्रीकांत धिवरे यांच्या निर्देशानुसार जिल्ह्यात सलग दुसऱ्या दिवशी शुक्रवारी (ता. ५) सर्व पोलिस ठाण्यांच्या कार्यक्षेत्रात नाकाबंदी आणि ऑपरेशन ऑलआउट राबविण्यात आले. गुरुवारी रात्री अकरा ते मध्यरात्रीनंतर तीनपर्यंत चाललेल्या या मोहिमेत गांजासह दोघांना अटक करण्यात आली. तसेच विविध केसेसमध्ये ६३ हजारांचा दंड वसूल झाला. लळिंग (ता. धुळे) टोलनाक्याजवळ नाशिक येथील दोघांना गांजासह पकडण्यात आले. (Two arrested with ganja in blockade fine )

तसेच जिल्ह्यात २३ ठिकाणच्या नाकाबंदीत १०२ केसेसद्वारे ६३ हजार ४०० रुपयांचा दंड वसूल करण्यात आला. मोहाडी पोलिस ठाण्यांतर्गत मुंबई-आग्रा महामार्गावरील लळिंग टोलनाक्याजवळ दुचाकी (एमएच १५, एफएक्स ०३७८)ने नाशिककडे जाणाऱ्या दोघांना पकडण्यात आले. त्यांच्याकडून एक लाख ५० हजार ६०० किमतीचा मानवी मेंदूवर परिणाम करणारा मादक पदार्थ गांजा आणि मोटारसायकल जप्त करण्यात आली. या प्रकरणी निशांत बापू कदम (रा. सातपूर, नाशिक) आणि राहुल सुरेश पाटील (रा. अशोकनगर, नाशिक) याला ताब्यात घेण्यात आले. ही कारवाई मोहाडी पोलिस ठाण्याचे प्रभारी अधिकारी शशिकांत पाटील आणि पथकाने केली.

पोलिस अधीक्षक धिवरे यांनी सर्व पोलिस ठाण्यांचे अधिकारी, उपअधीक्षकांना फरार व वॉन्टेड आरोपींना अटक करणे, अवैध शस्त्र शोधणे, अभिलेखावरील सराईत गुन्हेगार, हिस्ट्रिशीटर यांची तपासणी करणे, हॉटेल, लॉजेस, धाबे व गुन्हेगारी वस्त्यांची तपासणी, ड्रंक ॲन्ड ड्राइव्ह केसेस करणे, नाकाबंदीतून संशयित वाहनांची तपासणी, वॉरंटची बजावणी, अवैध व्यवसायांवर कारवाई करणे आदी निर्देश दिले. त्यानुसार जिल्ह्यात २३ ठिकाणी नाकाबंदी, ऑपरेशन ऑलआउटद्वारे सहाय्यक पोलिस अधीक्षक एस. हृषीकेश रेड्डी, पोलिस उपअधीक्षक भागवत सोनवणे यांनी देखरेख ठेवली. ही मोहीम सुरूच राहणार असल्याचे श्री. धिवरे यांनी सांगितले.