Dhule Crime News : साक्री तालुक्यात नाकाबंदी; 30 लाखांवर गुटखा जप्त

Dhule Crime News : स्थानिक गुन्हे शाखेच्या पथकाने साक्री तालुक्यात नाकाबंदी करीत दोन वाहनांतून २९ लाख ५५ हजारांचा गुटखा व पान मसालासह ४१ लाखांचा मुद्देमाल जप्त केला.

याप्रकरणी दोन संशयितांना ताब्यात घेतले.(Gutkha worth 30 lakhs seized in Sakri taluka dhule crime news)

अहवा (गुजरात) येथून वार्साकडे (ता. साक्री) पिकअप (एमएच ४१ एजी २४७२) व इको (एमएच २४ एएफ ०४९३) वाहनातून गुटख्याची वाहतूक होत असल्याची माहिती ‘एलसीबी’चे पोलिस निरीक्षक दत्तात्रेय शिंदे यांना मिळाली. दोन्ही वाहने शेंदवड (ता. साक्री)मार्गे येणार असल्याचे सांगण्यात आले. त्यानुसार एलसीबी पथकाने शेंदवडजवळ नाकाबंदी केली.

एका हॉटेलजवळ पथकाला दोन्ही संशयित वाहने उभी असल्याचे दिसले. पथकाने वाहनांचे चालक पंकज कैलास भोई (रा. वृंदावननगर, पिंपळनेर, ता. साक्री) तसेच रामजतन अवधराम प्रजापती (रा. महात्मा फुले कॉलनी, पिंपळनेर) याला ताब्यात घेतले. त्यांची चौकशी केली असता त्यांनी वाहनातील गुटखा हा रवींद्र साबळे (रा. पिंपळनेर) याच्या मालकीचा असल्याचे सांगितले.

दोन्ही वाहनात १३ लाख १८ हजार २८० रुपयाचा पानमसाला, १२ लाख ९४ हजार ५९२ रुपयांचा पानमसाला, तीन लाख ४३ हजारांची तंबाखू, असा एकूण २९ लाख ५५ हजार ८७२ रुपयांचा माल आढळला. दोन वाहनांसह सुमारे ४१ लाखांचा मुद्देमाल जप्त केला.

याप्रकरणी पिंपळनेर पोलिस ठाण्यात गुन्हा दाखल झाला. पोलिस अधीक्षक श्रीकांत धिवरे, अपर पोलिस अधीक्षक किशोर काळे यांच्या मार्गदर्शनाखाली पोलिस निरीक्षक दत्तात्रेय शिंदे, बाळासाहेब सूर्यवंशी, संजय पाटील, दिलीप खोंडे, संतोष हिरे, पंकज खैरमोडे, मुकेश वाघ, शशिकांत देवरे, देवेंद्र ठाकूर, जगदीश सूर्यवंशी, महेंद्र सपकाळ, हर्शल चौधरी, जितेंद्र वाघ यांच्या पथकाने ही कारवाई केली.