दसऱ्यामुळे धुळे बाजारपेठेत ‘रौनक’; खरेदीसाठी गर्दी

धुळे ः साडेतीन मुहूर्तांपैकी एक दसरा अर्थात विजयादशमीच्या (Vijaya Dashami) पूर्वसंध्येला शहरातील आग्रा रोडवर गर्दी उसळल्याने मुख्य बाजारपेठेला ‘रौनक’ आली. खरेदीसह उलाढालीत तेजी दिसून आली. दागदागिने, वस्त्र, मिठाई, झेंडूची फुले, पूजासाहित्य आदींच्या खरेदीसह नागरिकांची पावले ऑटोमोबाईल शोरूम व इलेक्ट्रॉनिक मार्केटमध्येही गर्दीच्या स्वरूपात दिसून आली. अशा उत्साही, चैतन्यमयी वातावरणामुळे ‘कोरोना गो’ची अनुभूती अनेकांनी घेतली.

दीड ते दोन वर्षांपासून कोरोनाच्या प्रादुर्भावामुळे बाजारपेठेसह बहुतांश सेवा, व्यवहार बंद होते. कोरोनाचा प्रादुर्भाव कमी झाल्यावर आणि शासनाने अनेक निर्बंध शिथिल केल्याने धुळेकरांना दसऱ्याचा शुभमुहूर्त सापडला. त्यांनी साठलेला काही प्रमाणातील पैसा खरेदीच्या रूपाने गुरुवारी (ता. १४) बाहेर काढला, असेच म्हणावे लागले. त्यामुळे शहरातील चौफेर लहानमोठ्या बाजारपेठेत दुपारनंतर तुडुंब गर्दी दिसून आली. त्यात खरेदीसह उलाढालीत तेजीचे सुखावह चित्र दिसले. असे चैतन्यमयी वातावरण जिल्ह्यातही ठिकठिकाणी दिसून आले.

विविध खरेदीचे नियोजन
दसरा खरेदीचा सुवर्णमुहूर्तच मानला जातो. त्यामुळे या दिवशी अर्थात शुक्रवारी (ता. १५) नवीन वस्तू, वाहने व सोने खरेदीकडे अनेकांचा कल असतो. सराफ बाजारपेठेतील सोन्या-चांदीच्या दालनांमध्ये दसऱ्याच्या पूर्वसंध्येलाही खरेदीसाठी गर्दी दिसली. शिवाय, वस्त्र खरेदीतील दुकाने गजबजलेली दिसली. खरेदीवर ऑफर्स दिल्यामुळे ग्राहक मोठ्या संख्येने आकर्षित झाल्याचे दिसले. अनेकांनी गृहोपयोगी वस्तू, वाहने, घरे (फ्लॅट) आदींची नोंदणी, तर काहींनी भूमिपूजनाचे नियोजन केले आहे. अशा उत्साहवर्धक वातावरणामुळे शुक्रवारीही बाजारपेठेत मोठी उलाढाल होण्याची अपेक्षा असेल.

झेंडूच्या फुलांचा दर वधारला
दसऱ्याला खऱ्या अर्थाने झेंडूची फुले मानकरी ठरतात. त्यामुळे या फुलांची मागणी वाढली; परंतु बाजारपेठेत फुलांची काहीशी कमी प्रमाणात आवक असल्याने गुरुवारी ही फुले सरासरी ८० रुपये किलोने विक्रीस होती. नवरात्रोत्सव आणि दसऱ्यामुळे झेंडूच्या फुलांचे भाव वधारले; परंतु अतिवृष्टीमुळे झेंडूचे उत्पादन कमालीचे घटले आहे. त्याचा परिणाम पुरवठ्यावर झाला असून, दर वधारल्याचे विक्रेत्यांनी सांगितले. जिल्ह्यात आष्टे, निजामपूर, कापडणे, देवभाने परिसरातील अनेक शेतकरी फुलशेती करतात. दसऱ्यानिमित्त बाजारपेठ फुलल्याने झेंडूच्या फुलांनी सायंकाळी सरासरी प्रतिकिलो ८० ते १०० रुपयांपर्यंत दर गाठला.