"कोरोना' अहवालास विलंब अयोग्य : आमदार गिरीश महाजन 

"कोरोना' अहवालास विलंब अयोग्य : आमदार गिरीश महाजन 


जळगाव  : जिल्ह्यात "कोरोना'चा प्रभाव वाढत असताना संशयित रुग्णांचे अहवाल पाच -पाच दिवस उशिरा येत असल्याने माजी मंत्री, आमदार गिरीश महाजन यांनी तीव्र नाराजी व्यक्त केली. तसेच संशयित रुग्णांची तपासणी योग्य पद्धतीने करण्याच्या सूचना देत जळगावात कोरोना "स्वब' तपासणी लॅब लवकरात लवकर सुरू करण्यात यावी, अशी मागणी त्यांनी केली असून, याबाबत पंतप्रधानांसह मुख्यमंत्र्यांना पत्र पाठविणार असल्याचे त्यांनी सांगितले. 


"कोरोना'च्या पार्श्वभूमीवर प्रशासनाकडून करण्यात येणाऱ्या उपाययोजनांचा आढावा घेण्यासाठी माजी मंत्री आमदार, गिरीश महाजन व महापौर भारती सोनवणे यांनी  छत्रपती शाहू महाराज रुग्णालयाला भेट दिली. यावेळी आमदार सुरेश भोळे, आमदार चंदुलाल पटेल, नगरसेवक कैलास सोनवणे, आयुक्त सतीश कुलकर्णी, महाजन यांचे जनसंपर्क अधिकारी अरविंद देशमुख, डॉ. राम रावलानी उपस्थित होते. 

आमदार गिरीश महाजन यांनी सध्या असलेल्या रुग्णांची स्थिती आणि प्रशासनाकडून केल्या जाणाऱ्या उपाययोजनांची महापालिका आयुक्तांकडून माहिती जाणून घेतली. नागरिकांनी रस्त्यावर, बाजारात गर्दी करू नये, "फिजिकल डिस्टन्सिंग'चे पालन व्हावे, यासाठी कठोर उपाययोजना करण्याच्या सूचना दिल्या. महापौर भारती सोनवणे यांनी महापालिका प्रशासनाकडून "हॉकर्स'ला बसण्यासाठी ठिकठिकाणी व्यवस्था करण्यात आली असल्याचे सांगितले. तसेच आमदारांकडून मिळालेल्या निधीतून मनपा रुग्णालय अत्याधुनिक साहित्यांनी सुसज्ज करण्यात येणार असल्याची माहिती दिली. 


वसतिगृह अधिग्रहीत 
जळगाव शहरात कोरोना संशयित रुग्ण वाढत असून, त्यादृष्टीने महापालिका प्रशासनाकडून योग्य ती खबरदारी घेण्यात येत आहे. शासकीय अभियांत्रिकी महाविद्यालयाचे वसतिगृह सध्या रिकामे असून, त्याठिकाणी गाद्या, उशी व इतर साहित्याची व्यवस्था तत्काळ करण्यासाठी कार्यवाही सुरू करण्याच्या सूचना महापौर व आयुक्त यांनी वैद्यकीय अधिकाऱ्यांना दिल्या. 

लिलाव रोटेशन पद्धतीने 
जिल्ह्यात नागरिक भाजीपाला, फळे विक्रीसाठी सकाळी बाजार समितीमध्ये सकाळी विक्रेते, हॉकर्स, खरेदीदार, नागरिक मोठ्या प्रमाणात गर्दी करीत असल्याचे दररोज निदर्शनास येते आहे. भाजीपाला, धान्य, फळे, कांदे-बटाटे यांचे व्यवहार वेगवेगळ्या ठिकाणी स्थलांतरित करून ते रोटेशन पद्धतीने खरेदी-विक्री करण्याची सूचना यावेळी समोर आली. जिल्हाधिकाऱ्यांसोबत याबाबत चर्चा करण्यात येणार असल्याचे आयुक्त सतीश कुलकर्णी यांनी सांगितले. 


"लॅब'साठी पाठपुरावा करणार 
जिल्ह्यात कोरोना रुग्ण वाढत असले तरी संशयितांचे स्वब घेऊन त्यांचे अहवाल येण्यास उशीर होत आहे. "कोरोना'ची लक्षणे असलेला रुग्ण तपासणीसाठी आल्यास रुग्णालयात योग्य ती खबरदारी घेतली जात नसल्याचे निदर्शनास आले आहे. वैद्यकीय अधिकाऱ्यांनी योग्य ती खबरदारी घ्यावी जेणेकरून "कोरोना'चा प्रादुर्भाव वाढणार नाही. जिल्ह्यात कोरोना स्वब तपासणी लॅब सुरू करण्यास मंजुरी मिळाली असली तरी त्याचे काम संथपणे सुरू आहे. जळगावसह प्रत्येक जिल्ह्यात लॅब सुरू करण्यासाठी पंतप्रधान नरेंद्र मोदी, मुख्यमंत्री उद्धव ठाकरे व आरोग्यमंत्री राजेश टोपे यांना पत्र पाठविणार असून स्वतः त्यासाठी पाठपुरावा करणार असल्याची माहिती माजी मंत्री आमदार गिरीश महाजन यांनी दिली. 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com