कृषिमंत्री म्हणताएत...'एक लाख शेतमजुरांना प्रशिक्षण देण्याचे उद्दिष्ट'

नाशिक : राज्यातील शेतमजुरांना कौशल्याधारित प्रशिक्षणाचा कार्यक्रम हाती घेण्यात आला आहे. राज्यातील एक लाख शेतमजुरांना प्रशिक्षित करण्याचे उद्दिष्ट ठेवण्यात आले आहे. सध्या कापूस व मका या पिकांसाठी फवारणीची कामे मोठ्या प्रमाणावर करावी लागणार आहेत. त्यामुळे या पिकांच्या क्षेत्रात कीटकनाशक फवारणीचे कौशल्याधारित प्रशिक्षण शेतमजुरांना प्राधान्याने दिले जाईल. कृषिमंत्री दादा भुसे यांनी ही माहिती दिली. 

शेतमजुरांना कौशल्याधारित प्रशिक्षण 

शेतीची उत्पादकता वाढविण्यासाठी शेतीमधील विविध निविष्ठांसोबत शेतमजुरांची कार्यक्षमता हा घटक महत्त्वाचा आहे. सध्याच्या पीकपद्धतीमध्ये औषध फवारणी, फळबागांची छाटणी, बीबीएफद्वारे पेरणी, कापूस वेचणी, सूक्ष्मसिंचनाची देखभाल दुरुस्ती, रोपवाटिकेतील कामे, नियंत्रित शेती, शेतमालाची स्वच्छता व प्रतवारी आदी सर्व कामे ही कौशल्यावर आधारित आहेत. याबाबत शेतमजुरांना कौशल्याधारित प्रशिक्षण देण्यात येणार आहे. त्यामुळे कामाची गुणवत्ता, दर्जा व वेग सुधारण्यास मदत होईल व शेतकऱ्यांनादेखील त्याचा फायदा होईल, असेही श्री. भुसे यांनी स्पष्ट केले. 

हेही वाचा > VIDEO : आश्चर्यच! एकीकडे रुग्णांसाठी खाटांची वणवण...अन् दुसरीकडे आयसोलेशन कोचेसचा प्रशासनाला विसर?

शेतमजुरांनी नोंदणी करावी 

शेतमजुरांचे कौशल्य वाढविणे, ग्रामीण भागात रोजगारनिर्मितीस चालना, सुरक्षितता व आरोग्य संरक्षण, कार्यक्षम व्यावसायिक सेवांची शेतकऱ्यांना उपलब्धता, पर्यावरणपूरक कृषी पद्धतीस प्रोत्साहन व गुणवत्तापूर्ण शेतमालाचे उत्पादन करण्यासाठी शेतमजुरांना कौशल्याधारित प्रशिक्षण कार्यक्रम राबविण्यात येत आहे. या प्रशिक्षणाबाबत संबंधित जिल्ह्यातील आत्मा प्रकल्प संचालक, जिल्हा अधीक्षक कृषी अधिकारी व तालुका कृषी अधिकारी यांच्या कार्यालयाशी संपर्क साधून ग्रामीण भागातील शेतमजुरांनी नोंदणी करावी आणि प्रशिक्षणाचा लाभ घ्यावा, असे कृषी विभागाचे सचिव एकनाथ डवले यांनी सांगितले.

हेही वाचा > झोळीत असतानाच नियतीने हिरावले पितृछत्र...आज त्याच लेकीच्या यशाने माऊलीच्या होते डोळ्यात आनंदाश्रू

संपादन - किशोरी वाघ