Nashik Crime News : उत्तर प्रदेशातील अल्‍पवयीन मुलीची अपहरणकर्त्यांच्या तावडीतून सुटका

नाशिक : उत्तर प्रदेश येथून अल्‍पवयीन मुलीचे अपहरण करून नाशिकला दाखल झालेल्‍या दोघांना पोलिसांनी ताब्‍यात घेत संशयितांच्‍या ताब्‍यातील अल्‍पवयीन मुलीची सोडवणूक केली आहे. (Nashik Crime Minor girl rescued from kidnappers in Uttar Pradesh)

अपहरणकर्त्यांनी अल्‍पवयीन मुलीस उत्तर प्रदेश येथून पळवत नाशिकला आणल्‍याची माहिती गुन्हे शाखा युनिट दोनच्या पथकाला मिळाली होती. यानंतर पोलिसांनी शिताफितीने कारवाई करताना अपहृत मुलीची सुटका केली. दोघा संशयितांना पकडले. गोरख मिठ्ठु बिंद (वय २१) आणि अभिषेक गोपाल मौर्या (दोघे रा. जि. चंदौली, उत्तर प्रदेश) अशी संशयितांची नावे आहेत.

उत्तर प्रदेशहून अल्‍पवयीन मुलीला अपहरण करून आणताना, हे तिघे अंबड परिसरातील दत्तनगर भागात वास्‍तव्‍य करत होते. गुन्हे शाखा युनिट दोनचे वरिष्ठ पोलिस निरीक्षक विद्यासागर श्रीमनवार यांच्या मार्गदर्शनाखाली उपनिरीक्षक अजय पगारे, सहायक उपनिरीक्षक विवेक पाठक, भारती देवकर, हवालदार प्रकाश महाजन, सुनील आहेर यांच्या पथकाने या प्रकरणी तपास करताना मुलीची सुटका केली. दोघा संशयितांना अंबड पोलिसांच्‍या स्‍वाधीन केले आहे. (latest marathi news)