चोरांनो अरे थांबा आता! सव्वा लाखाच्या कांदाचोरीने तालुक्यात खळबळ; पोलिसांत गुन्हा दाखल

कळवण (नाशिक) : चोरांनी जणू शेतकऱ्यालाच टार्गेट केले असून कांदा चोरीच्या घटना दिवसेंदिवस वाढत आहे. अशीच घटना कळवणमध्ये घडली. थोडाथिडका नव्हे तर तब्बल सव्वा लाखाचा कांदा भेंडी शिवारातून चोरी झाला. याबाबत पोलिस ठाण्यात गुन्हा दाखल झाला.

पोलिस ठाण्यात गुन्हा दाखल

तालुक्यात भेंडी शिवारात एक लाख २५ हजारांच्या २५ क्विंटल कांद्याची चोरी झाल्याची घटना मंगळवारी (ता.३) रात्री घडली. या घटनेने कांदा उत्पादक शेतकऱ्यांच्या डोळ्यात अश्रू आणले. राजकुमार देवरे यांनी नवी बेज व भेंडी शिवारातील शेतातील चाळीत कांदा साठवणूक केली आहे. त्यातून चोरट्यांनी कांदा लंपास केला. श्री. देवरे यांच्या फिर्यादीवरून चोरट्यां विरोधात कळवण पोलिस ठाण्यात गुन्हा दाखल झाला. बुधवारी (ता. ४) सकाळी शेतातील सालदार रामदास माळी-निकम यांच्या निदर्शनास ही बाब आल्यानंतर त्यांनी ही बाब श्री. देवरे यांना सांगितली. 

हेही वाचा > एक हात बिबट्याच्या जबड्यात, तरीही चिमुकला थेट भिडलाच; 12 वर्षांच्या गौरवची धाडसी झुंज

कांदाची चोरी झाल्यामुळे राजकुमार देवरे, मनोज देवरे, शरद देवरे, स्वप्नील भोसले यांनी देवळा, उमराणे, अभोणा, कनाशी बाजार समितीत शोध घेतला. याबाबत काहीच तपास लागला नाही. पोलिस निरीक्षक प्रमोद वाघ, पोलिस उपनिरीक्षक वाघमोडे, पोलिस कर्मचारी बोरसे, घरटे यांनी भेट देऊन कांदा चाळीची पाहणी करून पंचनामा केला. पिक-अप वाहनातून कांदाचोरी झाल्याचा पोलिसांचा कयास असून, वाहतूक मार्गावरून माहितगार व्यक्तीकडून ही चोरी झाल्याचा अंदाज आहे.  

हेही वाचा > काय बोलावं आता! जेव्हा न्यायाधिशांच्याच घरी होते चोरी; मुळासकट पुरावे नष्ट