अतिउच्च दाबाच्या विजेच्या टॉवरवर ‘हाय व्होल्टेज ड्रामा’

इंदिरानगर : मुरलीधरनगरमधील भाजी बाजारजवळील अतिउच्च दाबाच्या विजेच्या टॉवरवर शुक्रवारी (ता. ३) रात्री साडेनऊच्या सुमारास मजूर नेतीराम पकाराम वाघाडे चढल्याने सगळ्यांच्याच काळजाचा ठोका चुकला होता. सुमारे ६० मीटर उंचीच्या टॉवरवर ४० फुटापर्यंत तो गेला. तिथून काही अंतरावर अतिउच्च दाबाच्या वीजतारा होत्या.

तेथे मोठ्या संख्येने नागरिक जमा झाले आणि त्याला खाली उतरण्याचे आवाहन करू लागले. दरम्यान, एकाने येथील सामाजिक कार्यकर्ते एकनाथ नवले यांना ही बाब कळवली. त्यांनी तातडीने पोलिसांनाही माहिती दिली. अवघ्या पाच मिनिटात इंदिरानगर पोलिस ठाण्याचे सहाय्यक उपनिरीक्षक सुरेश पवार, भाऊराव गवळी, संदीप लांडे, मनीष चौधरी, अशोक कराड आणि सुधाकर आव्हाड तेथे पोचले. त्यांनी खालूनच या त्याच्याशी संवाद साधण्यास सुरवात करून त्यांना समजावत खाली उतरण्यास सांगितले. त्यांचे ऐकून तो खाली उतरला. पोलिसांनी त्यांना आपल्या वाहनात बसवत पाणी पाजले आणि विचारपूस करत आपल्यासोबत नेले आणि सर्वांनी सुटकेचा निःश्वास टाकला. नेतीराम नागपूर येथील रहिवासी असून, सिन्नर परिसरात मजुरी करतात, असे समजते.