Nashik Crime : महिलेची 3 तोळ्यांची पोत ओरबाडली

Nashik News : सिन्नर शहरातील शिर्डी महामार्गावरील ज्वाला माता लॉन्स येथे लग्नासाठी आलेल्या महिलेच्या गळ्यातील तीन तोळ्यांची सोन्याची पोत अज्ञात दुचाकीस्वारांनी ओरबाडून पळ काढण्याची घटना गुरुवारी (दि.11) सायंकाळच्या सुमारास घडली. (thief looted 3 tola gold jewellery of woman nashik crime)

गुळवंच येथील प्रतिभा विठ्ठल घुमरे (35) या आपल्या नातेवाईकाच्या लग्नासाठी ज्वाला माता लॉन्स येथे आल्या होत्या. लग्नाला वेळ असल्याने मेकअप करण्यासाठी त्या विजय नगरातील गजानन चौक येथील पार्लरमध्ये जाण्यासाठी पाई निघाल्या होत्या.

विजयनगर परिसरातील भाऊसाहेब खुळे यांच्या घरासमोर त्या आल्या असता समोरून दुचाकीवरून आलेल्या दोन भामट्यांनी त्यांच्याजवळ येत दुचाकीचा वेग कमी केला. मात्र, काही कळण्याच्या आतच दुचाकीवर पाठीमागे बसलेल्या भामट्याने प्रतिभा यांच्या गळ्यातील तीन तोळ्यांची सोन्याची पोत हिसकावली.

हेही वाचा : Credit Card फसवणूक....काय घ्याल काळजी?

प्रतिभा यांनी प्रतिकार करण्याचाही प्रयत्न केला. मात्र, दोघे भामटे दुचाकीवरून सुसाट वेगाने पसार झाले. प्रतिभा यांनी आरडाओरड केल्यानंतर परिसरातील नागरिक जमा झाले. सिन्नर पोलिसांना माहिती दिल्यानंतर त्यांनीही तात्काळ घटनास्थळी येत पाहणी केली.

मात्र, तोपर्यंत चोरटे पसार झाले होते. याप्रकरणी रात्री उशिरा प्रतिभा यांच्या फिर्यादीवरून अज्ञात चोरट्यांच्या विरोधात गुन्हा दाखल करण्यात आला आहे. अधिक तपास सहाय्यक पोलीस उपनिरीक्षक विजय माळी हे करत आहेत.