YCMOU Exam : ‘मुक्‍त’ची उद्याची परीक्षा होणार 28 जानेवारीला

YCMOU Exam : अयोध्या येथे आयोजित धार्मिक सोहळ्यानिमित्त सोमवारी (ता.२२) सार्वजनिक सुट्टी जाहीर केली आहे. या पार्श्वभूमीवर यशवंतराव चव्‍हाण महाराष्ट्र मुक्‍त विद्यापीठातर्फे परीक्षा वेळापत्रकात बदल केला आहे.

त्‍यानुसार या दिवशी नियोजित असलेली लेखी परीक्षा २८ जानेवारीला घेतली जाणार आहे. (YCMOU exam tomorrow will be on January 28 nashik news)

विद्यापीठाने यासंदर्भात परिपत्रक जारी करताना विद्यार्थी, विभागीय केंद्रांना सूचित केले आहे. त्‍यानुसार सोमवारी (ता.२२) सार्वजनिक सुट्टी जाहीर असल्‍याने यशवंतराव चव्‍हाण महाराष्ट्र मुक्‍त विद्यापीठाच्‍या राज्‍यातील विविध परीक्षा केंद्रांवर या दिवशी नियोजित सर्व शिक्षणक्रमांच्‍या सकाळ व दुपार सत्रातील परीक्षा २८ जानेवारीला होईल.

या मधून बी.एस्सी हा शिक्षणक्रम वगळला असून, नियोजित वेळापत्रकानुसार या शिक्षणक्रमाची परीक्षा होईल. तसेच बी.एसस्सी. (एमजीए) टी९७ या शिक्षणक्रमाची सोमवारी नियोजित परीक्षा २९ जानेवारीला घेतली जाणार आहे. या बदलाची विद्यार्थ्यांनी नोंद घ्यावी, असे आवाहन परीक्षा नियंत्रक भटू प्रसाद पाटील यांनी केले आहे.