'बर्ड फ्लू'चे सावट; मृत पक्ष्यांचे नमुने भोपाळच्या प्रयोगशाळेत, पशूसंवर्धन यंत्रणा अलर्ट

सूरज पाटील
Thursday, 14 January 2021

केळापूर तालुक्‍यातील लिंगटी शिवारात कुक्कुटपालन केंद्रातील पक्ष्यांचा मृत्यू झाल्यामुळे अज्ञात रोगाचा प्रसार जिल्ह्यात इतर ठिकाणी होण्याची शक्‍यता नाकारता येत नाही.

यवतमाळ : जिल्ह्यात अद्याप 'बर्ड फ्लू'चे निदान व्हायचे असले तरी मृत झालेल्या पक्ष्यांचे नमुने तपासणीसाठी भोपाळला पाठविण्यात आले आहेत. केळापूर तालुक्‍यात लिंगटी शिवारात मृत आढळलेल्या पक्ष्यांचा संसर्ग इतर ठिकाणी पसरू नये यासाठी यंत्रणांना दक्ष राहण्याचे निर्देश जिल्हाधिकारी एम. डी. सिंह यांनी दिले आहेत.

हेही वाचा - बहिण भावाला बोलवायला गेली, खिडकीतून दृश्य बघताच मोठ्यानं किंचाळली

देशात व राज्यात आढळलेल्या 'बर्ड फ्लू' संसर्गाच्या पार्श्वभूमीवर जिल्हाधिकाऱ्यांनी बुधवारी (ता.13) आढावा घेतला. यावेळी पोलिस अधीक्षक डॉ. दिलीप पाटील भुजबळ, निवासी उपजिल्हाधिकारी ललितकुमार वऱ्हाडे, सहायक आयुक्त डॉ. क्रांती काटोले, उपायुक्त डॉ. बी. आर. रामटेके, डॉ. नागापुरे, जिल्हा पशुसंवर्धन अधिकारी आर. डब्ल्यू. खेरडे आदी उपस्थित होते. निरोगी पक्षाचे चिकन खाण्यास कोणतेही निर्बंध नाही. मात्र, घरी आणलेले चिकन संपूर्णपणे उकळून (बॉईल) घ्यावे. मृत आढळलेल्या पक्षाच्या केंद्रातून इतर कोणताही पक्षी बाहेर जाता कामा नये. उपविभागीय अधिकाऱ्यांनी पशुसंवर्धन विभागाच्या संपर्कात राहून पक्षांची आवागमन करण्यास निर्बंध घालावे. पांढरकवडा परिसरात हा प्रकार आढळून आल्यामुळे संबंधित उपविभागीय अधिकाऱ्यांनी सर्व यंत्रणेला अलर्ट करून योग्य काळजी घ्यावी, असे निर्देश जिल्हाधिकाऱ्यांनी दिले.

हेही वाचा - घरात लक्ष्मी आली म्हणून बाप वाटत होता पेढे, पण एक फोन आला अन् सर्वच संपलं

यवतमाळात दोन कावळ्यांचा मृत्यू -
केळापूर तालुक्‍यात लिंगटी परिसरातील कुक्कुटपालन केंद्रात 286 पक्षांचा संशयित मृत्यू झाला. आर्णी तालुक्यात आठ मोर, दारव्हा तालुक्‍यात चार वराह, घाटंजी परिसरात चार कावळे व यवतमाळातील दोन कावळ्यांचा मृत्यू झाल्याची माहिती उपायुक्त डॉ. डॉ. बी. आर. रामटेके यांनी दिली.

हेही वाचा - यालाच म्हणतात नशीब! खात्यातून चोरीला गेले लाखो रुपये, पण तीन महिन्यानंतर मिळाले परत

लिंगटी अलर्ट झोन घोषित -
केळापूर तालुक्‍यातील लिंगटी शिवारात कुक्कुटपालन केंद्रातील पक्ष्यांचा मृत्यू झाल्यामुळे अज्ञात रोगाचा प्रसार जिल्ह्यात इतर ठिकाणी होण्याची शक्‍यता नाकारता येत नाही. त्यामुळे प्रतिबंधात्मक उपाययोजना म्हणून लिंगटी गाव शिवारातील कुक्कुट पक्षीगृहापासून दहा किलोमीटरमधील परिसरात कुक्कुट पक्ष्यांची खरेदी, विक्री, वाहतूक, बाजाराला प्रतिबंध करण्यात आला आहे. लिंगटी हे गाव अलर्ट झोन म्हणून घोषित करण्यात आले.


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: birds died in kelapur of yavatmal