नागझिरा प्रकल्प आग : मृतांच्या कुटुंबीयांना शासनाकडून ५ लाखांची मदत, आग विझविताना होरपळून झाला होता मृत्यू

भंडारा : नवेगाव नागझिरा व्याघ्र प्रकल्पात नागझिरा आणि पिटेझरी या दोन वनपरिक्षेत्रात काल लागलेल्या आगीतील दुर्दैवी मृत मजुरांच्या वारसांना ५ लाख रुपयांची मदत करण्याची घोषणा मुख्यमंत्री उद्धव ठाकरे यांनी केली आहे. आगीत जखमी वनमजुरांच्या उपचाराचा खर्चही शासन करणार आहे. याबाबत ट्विट करून माहिती देण्यात आली आहे. 

हेही वाचा - लसीचे दोन्ही डोस घेतल्यानंतरही कोरोनाचा संसर्ग, फेब्रुवारीतच झाले होते लसीकरण

गुरुवारी सकाळी ११.३० वाजताच्या सुमारास कक्ष क्र. ९८, ९९, १००, ९७ येथे आग लागली होती. सदर आग विझविण्याचे काम ५०-६० वन कर्मचारी, अधिकारी व हंगामी मजूर करत होते. सायंकाळी ५ वाजेपर्यंत आग आटोक्यात आली. पण दरम्यान वाऱ्याचा वेग वाढल्याने आग पुन्हा वाढली. विझविण्याचे कार्य सुरू असता कर्मचाऱ्यांना अचानक आगीने वेढले व पहाडी जागा असल्याने वणवा विझवणाऱ्यांपैकी दोन जण गंभीर जखमी झाले आणि ३ वनमजुरांचा मृत्यू झाला. मृतकांमध्ये राकेश युवराज मडावी (वय 40 वर्ष राहणार थाडेझरी), रेखचद गोपीचंद राणे (वय 45 राहणार धानोरी), सचिन अशोक श्रीरंगे (वय 27 राहणार कोसमतोंडी) यांचा समावेश आहे. तर विजय तीजाब मरस्‍कोले (वय 40 वर्ष राहणार थाडेझरी तालुका सडक अर्जुनी) व राजू शामराव सयाम (वय 30 वर्ष राहणार बोरुंदा) हे दोघे गंभीररीत्या भाजले आहेत. त्यांना पुढील उपचारासाठी नागपूरला पाठवलेले आहे. त्यांच्यावर उपचार सुरू आहेत.

हेही वाचा - अज्ञातानी लावलेली आग विझवित होते वनमजूर, पण आग भडकली अन् निष्पाप जीवांचा गेला बळी

मरण पावलेले तिघे पहाडावर होते आणि त्यांना आगीने चहूबाजूने वेढले होते. त्यामुळे त्यांना खाली येता नाही आले. त्यांतील एक जण खाली आला त्याला आम्ही वाचवले. या घटनेनंतर आम्ही जबाबदारी झटकणार नाही. मृतांच्या कुटुंबीयांना जास्तीत जास्त मदत कशी करता येईल, त्यावर आमची चर्चा सुरू असल्याचे नवेगाव बंध नागझिराच्या उपसंचालक पूनम पाटे यांनी सांगितले.

कालच्या घटनेत तीन हंगामी मजूर मरण पावले, तर जखमी झालेल्या दोघांना आम्ही नागपूरच्या ऑरेंज सिटी हॉस्पिटलमध्ये दाखल केले आहे. तेथे त्यांच्यावर उपचार सुरू आहेत. मरण पावलेले हंगामी मजूर असल्यामुळे शासनाकडून काही मदत मिळण्याची आशा धूसर होती. मात्र, मुख्यमंत्री उद्धव ठाकरेंनी त्यांना मदत घोषित करून त्यांच्या कुटुंबीयांना मदतीचा हात पुरविला आहे.