ब्रेकिंग! सलग दुसऱ्या दिवशी एकाच शेतात आढळला डोके व समोरचे दोन पंजे नसलेल्या बिबट्याचा मृतदेह; वनविभाग चिंतेत

गोरेगाव (जि. गोंदिया) : गोरेगाव वनपरिक्षेत्रातील इंदिरानगर, तिल्ली मोहगाव येथील शेतातील विहिरीत बिबट्याचा (नर) मृतदेह रविवारी (ता. ३) सकाळी आढळल्याने खळबळ उडाली होती. मात्र, सोमवारी (ता. ४) दुपारी १२ वाजताच्या सुमारास पुन्हा याच शेतात ५० मीटर अंतरावर बिबट्या मृतावस्थेत आढळून आला. या घटनेमुळे वनविभागासमोर शिकार की अन्य कारणाने बिबट्याचा मृत्यू झाला, याचा उलगडा करण्याचे मोठे आव्हान उभे ठाकले आहे.

इंदिरानगर, तिल्ली मोहगाव येथील देवचंद सोनवाने यांच्या मालकीच्या शेतातील विहिरीत बिबट्याचा मृतदेह रविवारी आढळला होता. मृतदेह बाहेर काढल्यानंतर बिबट्याच्या समोरील पायाचे दोन्ही पंजे गायब असल्याचे समोर आले. त्यानंतर परिसरात पाहणी केल्यावर एका निलगायीचे डोके व पाय कुजलेल्या अवस्थेत वेगवेगळ्या जागेवर आढळून आले होते.

जाणून घ्या - शेतातील विहिरीत तरंगतांना दिसला बिबट्याचा मृतदेह; बाहेर काढताच उपस्थितांच्या अंगाचा उडाला थरकाप

या घटनेची शाई वाळते न वाळते तोच सोमवारी (ता. ४) दुपारी १२ वाजताच्या सुमारास ५० मीटर अंतरावर बिबट्याचा मृतदेह आढळला. या बिबट्याचे डोके व समोरचे दोन पंजे गायब असल्याचे वनविभागाच्या अधिकारी, कर्मचाऱ्यांना दिसले. या बिबट्याचा १५ दिवसांपूर्वी मृत्यू झाला असावा, असा अंदाज व्यक्त केला जात आहे. 

एकापाठोपाठ दुसऱ्या बिबट्याचा मृतदेह सापडल्याने वनविभागासमोर मोठे आव्हान उभे ठाकले आहे. उल्लेखनीय म्हणजे, या परिसरात वन्यप्राण्यांची यापूर्वी शिकार झाली आहे. माहितीवरून गोरेगाव येथील वनविभागाचे अधिकारी, कर्मचारी घटनास्थळी पोहोचले. परिस्थितीवरून बिबट्याची शिकार झाली असावी, असा अंदाज वनविभागाने व्यक्त केला आहे.

अधिक वाचा - पुणे- नागपूर शिवशाहीत आढळलं संशयास्पद पार्सल; चालकानं बॉक्स उघडताच सरकली पायाखालची जमीन

शिकार की अन्य कारणाने बिबट्याचा मृत्यू

गोरेगाव वनपरिक्षेत्रातील इंदिरानगर, तिल्ली मोहगाव येथील शेतातील विहिरीत बिबट्याचा (नर) मृतदेह आढळून आल्याने खळबळ उडाली होती. या बिबट्याचे समोरचे दोन पंजे गायब असल्याने शिकार झाली असावी, असा प्राथमिक अंदाज व्यक्त केला जात होता. शेतातील विहिरीत बिबट्याचा मृतदेह तरंगत असल्याची माहिती एका व्यक्तीने वनविभागाला दिली होती. आज पुन्हा शेतात ५० मीटर अंतरावर बिबट्या मृतावस्थेत आढळून आला. या घटनेमुळे वनविभागासमोर शिकार की अन्य कारणाने बिबट्याचा मृत्यू झाला, याचा उलगडा करण्याचे मोठे आव्हान उभे ठाकले आहे.

संपादन - नीलेश डाखोरे