सारोळा पीर येथील शेतकऱ्याने संपविली जीवनयात्रा

मोताळा (जि.बुलडाणा) : तालुक्यातील सारोळा पीर येथील 54 वर्षीय शेतकऱ्याने विष प्राशन करून आत्महत्या केल्याची घटना शुक्रवारी (ता.24) सकाळी साडे दहा वाजताच्या सुमारास ढोणखेड शिवारात उघडकीस आली. कडूबा ज्ञानदेव चव्हाण असे त्यांचे नाव आहे.

सविस्तर असे की, तालुक्यातील सारोळा पीर येथील शेतकरी कडूबा ज्ञानदेव चव्हाण (वय 54) यांनी ढोणखेड शिवारात गट नंबर 18 मधील शेतात विषारी औषध प्राशन करून जीवनयात्रा संपविली. सदर घटना शुक्रवारी सकाळी 10.30 वाजताच्या सुमारास उघडकीस आली. माहिती मिळताच धामणगाव बढे पोलिस ठाण्याचे पीएसआय योगेश जाधव यांनी सहकाऱ्यांसह घटनास्थळी धाव घेतली.

हेही वाचा - बहुजनांची डोके फुटू नये, म्हणून राज ठाकरे यांनी एवढे करावे ः पुरुषोत्तम खेडेकर

चिठ्ठी पोलिसांच्या ताब्यात
पोलिसांनी पंचनामा करून मृतदेह शवविच्छेदनासाठी बुलडाणा रवाना केला. मृतक शेतकऱ्यांजवळ एक चिठ्ठी मिळून आली असून, पोलिसांनी मृतकाच्या नातेवाइकांच्या उपस्थितीत सदर चिठ्ठी ताब्यात घेतल्याची माहिती आहे. या प्रकरणी गोपाल देविदास चव्हाण (रा. सारोळा पीर) यांच्या फिर्यादीवरून धामणगाव बढे पोलिसांनी मर्ग दाखल केला आहे. पुढील तपास ठाणेदार देवेंद्रसिंह ठाकूर यांच्या मार्गदर्शनात एएसआय ब्रिजलाल मापारी करीत आहेत.

क्लिक करा - वंचितच्या बंदचा भाजप आमदाराला फटका

काय आहे चिठ्ठीतील मजकूर?
वारंवार अर्ज करूनही माझी शेतजमीन माझ्या नावावर नोंद करण्यात आली नाही, असे नमूद असून महसूल विभागाच्या काही कर्मचाऱ्यांचा उल्लेख असल्याची माहिती सूत्रांकडून मिळाली आहे. दरम्यान, पोलिसांनी मोताळा तहसीलदारांना या प्रकरणी चौकशी करून अहवाल मागितल्याचे समजते.