ग्रामीण भागात घराघरांत रुग्ण, पण कोविड केअर सेंटरमध्ये कर्मचाऱ्यांचा अभाव

नागपूर : ग्रामीण भागात कोरोना रुग्णांची संख्या वाढत आहे. गावातील घराघरांत रुग्ण असल्याचे सांगण्यात येते. शहरातील रुग्णालयांत जागा नाही. ग्रामीण भागात आपत्कालीन उपचाराची सोय नाही. औषधांचा तुटवडा, मनुष्यबळाचा अभाव आहे. कंत्राटी कर्मचारी मिळत नसल्याचे सांगण्यात येते. अशीच स्थिती राहिल्यास परिस्थिती हाताबाहेर जाण्याची चिंता व्यक्त करण्यात येत आहे.

जिल्हा परिषदेच्या आरोग्य विभागाकडून मिळालेल्या माहितीनुसार, ११ कोविड केअर सेंटर सुरू झाले आहेत. हे सेंटरही हाउसफुल्ल असल्याचे सांगण्यात येत आहे. यातील काही सेंटरमध्ये ऑक्सिजनची व्यवस्था आहे. मनुष्यबळाचा मात्र प्रचंड तुटवडा आहे. जिल्हा परिषदेने डॉक्टर्स, नर्स, फार्मासिस्ट, डाटा एंट्री ऑपरेटर, अटेंडन्स या पदांसाठी जाहिराती दिल्या आहेत. पण, कर्मचारी मिळत नसल्याची स्थिती आहे. एमबीबीएस डॉक्टर सोडाच, बीएएमएस डॉक्टर्ससुद्धा आरोग्य विभागाला मिळत नसल्याचे चित्र आहे. निवड करणारे अधिकारी उमेदवारांना चांगली वागणूक देत नसल्याचा आरोप आधीच पदाधिकाऱ्यांकडून लावण्यात आला आहे. यामुळेही कर्मचारी मिळत नसल्याची चर्चा आहे.