Big Breaking : भाजपच्या गडाला सुरुंग; अभिजित वंजारी १८ हजार ९१० मतांनी विजयी

नागपूर : नागपूर पदवीधर मतदारसंघात ५८ वर्षांनी कॉंग्रेसने भाजपच्या गडाला सुरुंग लावत विजयी पताका फडकविली. महाविकास आघाडीचे उमेदवार ॲड. अभिजित वंजारी यांनी भाजपचे संदीप जोशी यांचा १८ हजार ९१० मतांनी पराभव केला. आज दुपारी पार पडलेल्या मतमोजनीनंतर त्यांच्या विजयाची अधिकृत घोषणा करण्यात आली. ॲड. अभिजित वंजारी यांना ६१ हजार ७०१ मत तर भाजपचे संदीप जोशी यांना ४२ हजार ७९१ मते मिळाली.

नागपूर पदवीधर मतदारसंघाच्या १ डिसेंबर रोजी पार पडलेल्या मतदानानंतर गुरूवारी (ता. ३) दुपारपासून मतमोजनीस सुरुवात झाली. यामध्ये अभिजित वंजारी यांना पाचव्या फेरीत ५६ हजार ५३० तर  संदीप जोशी यांना ४१ हजार १७२ पहिल्या पसंतीचे मत मिळाले.

एनएसयूआय ते पदवीधर आमदार, वंजारींचा राजकीय कारकिर्दीतील पहिलाच विजय

यामध्ये वंजारी यांना १४ हजार ३५८ मतांची आघाडी होती. मात्र, एकूण मतानुसार ठरलेला ६० हजार २४७ मतांचा कोटा दोन्ही उमेदवारांनी पूर्ण केला नसल्याने बाद फेरीस सुरुवात करण्यात आली.

शुक्रवारी दुपारी १ वाजताच्या सुमारास अभिजित वंजारी यांनी ६१ हजार ७०१ मत घेऊन कोटा पूर्ण करीत विजय पटकाविला. भाजपचे संदीप जोशी यांना ४२ हजार ७९१ मत मिळाली. यानंतर विभागीय आयुक्त संजीवकुमार यांनी ॲड. अभिजित वंजारी यांना प्रमाणपत्र प्रदान केले.

भाजपचा बालेकिल्ला ढासळणार! महाआघाडीचा विजय दृष्टीक्षेपात; वंजारींना हवे अवघे ३,८०० मते

यावेळी क्रीडा व युवक कल्याण मंत्री सुनील केदार, सेनेचे खासदार कृपाल तुमाने, आमदार विकास ठाकरे, माजी मंत्री राजेंद्र मुळक, नाना गावंडे, राष्ट्रवादीचे नेते आणि कॉंग्रेस पदाधिकारी उपस्थित होते. यावेळी अभिजित वंजारी यांच्या विजयाने कॉंग्रेससह महाविकास आघाडीच्या पदाधिकाऱ्यांनी मतमोजनी केंद्राबाहेर एकच जल्लोष केला.

कार्यकर्ता, नेत्यांच्या मेहनतीचा विजय

भाजपच्या बालेकिल्ला समजल्या जाणाऱ्या नागपूर पदवीधर मतदारसंघात महाविकास आघाडीचे सर्वच नेते व कार्यकर्त्यांनी मेहनत घेत विजयासाठी प्रयत्न केले. याला जनतेच्या आशीर्वादाची जोड मिळाली. त्यामुळेच विजय सहज शक्य झाल्याचे ॲड. अभिजित वंजारी म्हणाले. मिळालेला विजय सर्वसमावेशक असून जनतेचा विश्वास सार्थ करायचा आहे. त्यासाठी पूर्णवेळ प्रयत्न करणार आहे.

संपादन - नीलेश डाखोरे