अख्खं गाव हळहळले! दोघांवर एकाचवेळी अंत्यसंस्कार, फुटला अश्रूंचा बांध

तिवसा(अमरावती) : तालुक्‍यातील दापोरी खुर्द येथील दोघांनी आत्महत्या करून आपली जीवनयात्रा संपविली. शेतमजुराने १५ जानेवारीला विष घेतले होते. रविवारी त्यांचा मृत्यू झाला, तर शेतकऱ्याने रविवारी (ता.१७) गळफास घेऊन आत्महत्या केल्याची घटना उघडकीस आली. एकाचवेळी गावातील दोघांनी जीवनयात्रा संपविल्याने संपूर्ण गावावर शोककळा पसरली आहे.

हेही वाचा - १८ वर्ष होवूनही झालं नाही बाळ, पती घरी येताच पत्नी मोठ्यानं किंचाळली अन् घडला थरार

शेतमजूर दिनेश रूपराव उईके (वय ४०), तर शेतकरी सारंगधर महादेव वावरे (वय ५२), असे आत्महत्या करणाऱ्यांची नावे आहेत. वाढती महागाई व हाताला काम नसल्याने आर्थिक डबघाईस आलेल्या दिनेश उईके यांनी गावातीलच रस्त्यावर कीटकनाशक प्राशन केले. गंभीर स्थितीत असलेले उईके हे त्यांचे चुलत भाऊ यांना दिसताच त्यांना अमरावतीच्या जिल्हा रुग्णालयात हलविण्यात आले. मात्र, रविवारी (ता. १७) उपचारादरम्यान त्यांचा मृत्यू झाला. त्यांच्या पश्‍चात आई, वडील, पत्नी व दोन मुली असा परिवार आहे. 

हेही वाचा - काळोखात कुत्रासदृश्य प्राणी दिसल्यानं मारली काठी, समोर येताच वाचवा-वाचवा ओरडली

दुसरी घटना रविवारी (ता. १७) उघडकीस आली. पहाटे शेतात जाणाऱ्या व्यक्तीला शेतातील झोपडीमध्ये शेतकरी सारंगधर वावरे गळफास घेतलेल्या अवस्थेत आढळून आले. या घटनेची माहिती तिवसा पोलिसांना मिळताच त्यांनी घटनास्थळी धाव घेत पंचनामा केला आहे. दोघांवरही गावातील स्मशानभूमीत अंत्यसंस्कार करण्यात आले. मृतक वावरे यांच्या पश्‍चात पत्नी, दोन मुली, मुलगा व मोठा परिवार आहे. मृतक वावरे यांच्याकडे तीन एकर शेती असून यावरच त्यांच्या कुटुंबाचा उदरनिर्वाह चालत होता. मात्र, गेल्या काही वर्षांपासून सततच्या नापिकीमुळे वावरे कुटुंब मोठ्या अडचणीत असल्याने त्यांनी हे टोकाचे पाऊल उचलून आपली जीवनयात्रा संपविली. तर उईके यांनी हाताला काम नसल्याने व आर्थिक स्थिती डबघाईस आल्याने विषप्राशन करून आत्महत्या केल्याचे बोलले जात आहे.