Mira-Bhayandar मध्ये मराठी मोर्चाला परवानगी नाकारली, मनसे नेत्यांची धरपकड | MNS Andolan

मीरा-भाईंदरमध्ये अमराठी व्यावसायिकांनी नुकताच मोठा मोर्चा काढून शक्तीप्रदर्शन केलं. याला प्रत्युत्तर म्हणून महाराष्ट्र नवनिर्माण सेनेने (मनसे) मोर्चा काढण्याची घोषणा केली होती. मात्र, पोलिसांनी या मोर्चाला परवानगी नाकारली असून काल (सोमवार) रात्रीपासूनच प्रतिबंधात्मक कारवाईला सुरुवात करण्यात आली आहे. पोलिसांनी मनसेसह ठाकरे गटाच्या काही कार्यकर्त्यांना आधीच नोटीस बजावली होती. मनसे नेते अविनाश जाधव यांनाही मोर्चा न काढण्याचा इशारा देणारी नोटीस पाठवण्यात आली होती. मात्र, जाधव मोर्चा काढण्याच्या निर्णयावर ठाम राहिल्याने मंगळवारी पहाटे ३.३० वाजता पोलिसांनी त्यांच्या निवासस्थानी जाऊन त्यांना ताब्यात घेतलं. तसेच मनसेचे नेते संदीप देशपांडे आणि राजू पाटील यांनाही पोलिसांनी नोटीस बजावली आहे. प्रशासनाकडून परिस्थिती नियंत्रणात ठेवण्यासाठी सतर्कता बाळगली जात असून, मोठ्या प्रमाणावर पोलीस बंदोबस्त तैनात करण्यात आला आहे.