अमरावती - समृद्धी महामार्गाच्या कंत्राटदाराने संपादीत आणि मोबदला दिलेल्या जमिनीपैकी उर्वरित जमिनीचा बेकायदा ताबा घेतला. या ०.१६ आर. क्षेत्रावरील संत्र्याच्या ३० झाडांसह तार कंम्पाऊंड तसेच टिनाचे घर या साहित्याची नासधूस केल्याचा आरोप धामणगावरेल्वे तालुक्‍यातील आसेगाव येथील शेतकरी रामाश्रय भगत यांनी केला आहे. या संदर्भात जिल्हाधिकाऱ्यांना निवेदन देत नुकसानभरपाईची मागणीही त्यांनी केली आहे. 

रामाश्रय भगत यांची आसेगाव शिवारातील गट क्रमांक २०५/२ मध्ये एकूण एक हेक्‍टर २१ आर. इतकी शेतजमीन होती. यातील १ हेक्‍टर ०५ आर. शेतजमिनीचे संपादन समृद्धी महामार्गाकरिता करण्यात आले. त्याचा कायदेशीर मोबदलाही त्यांना देण्यात आला. उर्वरित ०.१६ आर. जमीन रामाश्रय भगत यांच्या वहितीखाली होती. 

ताज्या बातम्यांसाठी डाऊनलोड करा ई-सकाळचे ऍप    

या क्षेत्रावर त्यांची संत्र्याची तीस झाडे होती. त्यासोबतच या क्षेत्रावर त्यांनी टिनशेडचे घर, पाईपसंच तसेच तार कंम्पाऊंड देखील ठेवले होते. समृद्धी महामार्गाच्या कंत्राटदाराने या क्षेत्रात विनापरवानगी प्रवेश करीत या साहित्याची नासधूस केली, असा आरोप रामाश्रय भगत यांनी केला आहे. याची प्रत्यक्ष पाहणी करुन नुकसानभरपाई देण्यात यावी, अशी मागणी त्यांनी केली आहे. 

शेतीविषयी बातम्या वाचण्यासाठी क्लिक करा

समृद्धी महामार्गाच्या कंत्राटदाराने १६ आर. जमिनीवरील साहित्याची नासधूस केली. इतक्‍या लहान क्षेत्राची मोजणी होत नसल्याचा दावा त्याकरिता त्यांनी केला आहे. परंतु, जमिनीचा ताबा घेताना त्याकरिता रीतसर भूसंपादन करून मोबदला देण्याची गरज आहे. 
- रामाश्रय भगत, शेतकरी