पाथर्डी : तालुक्‍यातील भगवानगड व 36 गावे पाणीयोजनेसह अन्य 32 गावांतील पाणीयोजनांसाठी 226 कोटी रुपयांच्या कृतिआराखड्याला जिल्हा परिषदेने मंजुरी दिली. 134 गावांतील पाणीयोजनांची कामे यात प्रस्तावित आहेत. 15वा वित्त आयोग व जलजीवन मिशनच्या माध्यमातून ही कामे केली जाणार आहेत. टंचाईचा सामना करताना, महाराष्ट्र जीवन प्राधिकरण व पंचायत समितीचा ग्रामीण पाणीपुरवठा विभाग त्याची अंमलबजावणी करणार आहे. 

पाथर्डीची "दुष्काळी तालुका' म्हणूनच राज्याला ओळख. आजही काळेवाडी, हाकेवाडी व रांजणी येथे पाणीयोजना नाही. ग्रामपंचायतीला मिळणाऱ्या 15व्या वित्त आयोगाचा 50 टक्के निधी पाणीयोजनेवर खर्च करण्याचा निर्णय झाला आहे. निधी कमी पडेल तेथे जलजीवन मिशनच्या माध्यमातून पाणीयोजनेसाठी निधी दिला जाणार आहे. तसा कृतिआराखडा पालकमंत्री हसन मुश्रीफ यांनी मंजूर केला आहे. शेवगाव-पाथर्डी ग्रामीण पाणीपुरवठा योजना, भगवानगड व 36 गावे पाणीयोजना, तसेच 32 गावांत स्वतंत्र पाणीयोजनांची कामे प्राधान्याने करण्यात येणार आहेत. 

हेही वाचा - हिरण हत्याप्रकरणी पोलिसांकडे सबळ पुरावे

भगवानगड व 36 गावांची योजना (दोनशे कोटींची) राबविण्यासाठी महाराष्ट्र जीवन प्राधिकरण काम करीत आहे. शेवगाव-पाथर्डी ग्रामीण पाणीपुरवठा योजना व 32 गावांत स्वतंत्र पाणीयोजनेची (सव्वीस कोटी) कामे पंचायत समितीचा ग्रामीण पाणीपुरवठा विभाग करीत आहे. 

तालुक्‍यातील पाणीयोजनेची कामे करण्यासाठी महाराष्ट्र जीवन प्राधिकरण व पंचायत समितीचा ग्रामीण पाणीपुरवठा विभाग काम करीत आहे. 226 कोटींच्या कृतिआराखड्याला मंजुरी मिळाली आहे. पंधराव्या वित्त आयोगाच्या निधीतून व जलजीवन मिशनच्या माध्यमातून हा निधी मिळणार आहे. स्थानिक पदाधिकारी, ग्रामसेवक, पंचायत समितीचा पाणीपुरवठा विभाग एकत्रितरीत्या ही कामे मार्गी लावेल. भगवानगड व 36 गावे पाणीयोजना महाराष्ट्र जीवन प्राधिकरणाकडे आहे. 
- अनिल सानप, उपअभियंता, ग्रामीण पाणीपुरवठा विभाग, पाथर्डी