राळेगणसिद्धी (जि. अहमदनगर) : सामाजिक कार्यकर्ते पोपटराव पवार यांना मिळालेला पुरस्कार म्हणजे हिवरेबाजार गावाने आजपर्यंत केलेल्या कामाची पावती आहे. त्यांनी दिल्ली येथे सर्व गावकऱ्यांचे प्रतिनिधी म्हणून पुरस्कार स्वीकारला आहे, अशा शब्दांत ज्येष्ठ समाजसेवक अण्णा हजारे यांनी पवारांसह सर्व गावकऱ्यांचेही अभिनंदन केले.

हिवरेबाजारचे सरपंच पोपटराव पवार यांना नुकतेच राष्ट्रपती रामनाथ कोविंद यांच्या हस्ते पद्मश्री पुरस्काराने सन्मानित करण्यात आले. पवार यांनी सपत्नीक राळेगणसिद्धी येथे येऊन ज्येष्ठ समाजसेवक अण्णा हजारे यांची भेट घेऊन आशीर्वाद घेतले. हजारे म्हणाले, की लवकरच पोपटराव पवारांना पद्मभूषण पुरस्कार मिळावा. पद्म पुरस्कारामुळे गावाला, समाजाला, देशाला एक नवी प्रेरणा मिळते. अहमदनगर जिल्ह्याला दोन पद्मश्री, तर राजस्थान येथील सामाजिक कार्यकर्ते श्यामसुंदर पालीवाल यांनाही पद्मश्री पुरस्कार मिळाल्याचा आनंद त्यांनी व्यक्त केला.
यावेळी आमदार नीलेश लंके, उद्योजक दादा पठारे, अशोक सावंत, सरपंच लाभेश औटी, माजी सरपंच जयसिंग मापारी, मंगल मापारी, शरद मापारी, दिलीप देशमुख, विमल ठाणगे, श्यामराव पठाडे, पत्रकार मार्तंड बुचडे, सुनील हजारे, दत्ता आवारी, नाना आवारी, अन्सार शेख यांच्यासह राळेगणसिद्धी व पंचक्रोशीतील ग्रामस्थ उपस्थित होते. यावेळी पोपटराव पवार, सरपंच लाभेश औटी, जयसिंग मापारी, शरद मापारी आदींनी मनोगत व्यक्त केले.

राहीबाई पोपेरे यांनी बीजसंवर्धनाचे काम हाती घेऊन, त्या कामात जीव तोडून त्यांनी लक्ष केंद्रित केले. हायब्रिड बियाण्यामुळे आपले आयुष्य कमी होत आहे. त्यामुळे राहीबाईंनी देशी वाण व बियाण्यांचे केलेले जतन खूप महत्त्वाचे आहे, असे अण्णा म्हणाले.

पोपटराव पवार यांना मिळालेला पद्मश्री पुरस्कार म्हणजे गेल्या ३० वर्षांत गावकऱ्यांनी केलेले परिश्रम व मेहनतीची सरकारकडून मिळालेली पावती आहे. त्यांनी दिल्ली येथे तुमचे प्रतिनिधी म्हणून पुरस्कार स्वीकारला आहे.
- अण्णा हजारे, ज्येष्ठ समाजसेवक, राळेगणसिद्धी