जामखेड तालुका - पावसाअभावी जामखेड तालुक्यातील ११ लघुपाटबंधारे तलावांपैकी तब्बल सात तलाव कोरडेठाक आहेत, तर खैरी मध्यम प्रकल्पात केवळ १२ टक्के पाणीसाठा असल्याने तालुक्याला पाणीटंचाईला सामोरे जावे लागणार आहे. त्यामुळे प्रशासनाने खैरी व मोहरी तलावांतील पाणी राखीव ठेवले आहे.

जामखेड तालुक्यात सरासरीच्या केवळ ९२ टक्केच पाऊस झाला आहे. हा पाऊस विस्कळीत स्वरूपात झाल्याने या तलावांमध्ये पाणीसाठा झाला नाही. सप्टेंबरच्या शेवटी झालेल्या पावसामुळे तालुक्यात खरीप पिकांना काही प्रमाणात जीवदान मिळाले, तर या पावसाच्या ओलीवरच रब्बी ज्वारीच्या पेरण्या शेतकरी करताना दिसत आहेत.

विंचरणा नदीवरील ११९ दशलक्ष घनफूट क्षमता असलेला भुतवडा तलाव व ४८.२५ दशलक्ष घनफूट क्षमता असलेला भुतवडा जोड तलाव आणि ८३.७० दशलक्ष घनफूट क्षमता असलेला रत्नापूर लघुपाटबंधारे तलाव गेल्या महिन्यांत पाटोदा तालुक्यात झालेल्या अतिवृष्टीमुळे पूर्ण क्षमतेने भरले. मात्र, अन्य सात तलाव कोरडेठाक राहिल्याचे विदारक चित्र पहायला मिळत आहे.

५३३.६० दशलक्ष घनफूट क्षमता असणाऱ्या खैरी मध्यम प्रकल्पात केवळ १२ टक्के पाणीसाठा आहे, तर ६२.५० दशलक्ष घनफूट क्षमता असलेल्या मोहरी तलावात ३४.९६ दशलक्ष घनफूट पाणीसाठा आहे.

संभाव्य पाणीटंचाई लक्षात घेता, खैरी मध्यम प्रकल्पातील पाणीसाठा आणि मोहरी लघुपाटबंधारे तलावातील पाणीसाठा पिण्यासाठी राखीव ठेवण्यात येणार आहे.

योगेश चंद्रे, तहसीलदार.

लघुपाटबंधारे तलाव

(कंसात साठवण क्षमता)

धोंडपारगाव (८७.९३)

पिंपळगाव आळवा (१००.४९)

अमृतलिंग (४८.४०)

धोत्री ( ५५.६०)

नायगाव (८३.७६)

तेलंगशी (३७.९४)

जवळके ( ३६.१९)

बंधाऱ्यांतील साठा

(कंसात क्षमता)

जवळा - १५.३७ (४३.२५)

कवडगाव - ९.०० ( ०.७१)

गिरवली - २.७४ ( २२.७८)

पिंपरखेड - ११.३३ (२३.४०)

सांगवी - ४.५७ ( ३०.४५)

मंडलनिहाय पाऊस

(कंसात टक्केवारी)

जामखेड - ६०६.९ मिमी (१०४.२)

अरणगाव - ४७३.३ मिमी (८२)

खर्डा - ४८३ मिमी ( ८३)

नान्नज - ५१८ मिमी ( ८९)

नायगाव - ५१८ मिमी (१००.३)

एकूण - ५३३.४ मिलिमीटर (९२ टक्के)