कोल्हार : कोरोनामुळे लॉकडाउनच्या काळात तीन महिने बंद राहिलेली केशकर्तनालये एकदाची उघडली. रोजीरोटीचा धंदा सुरू झाल्यामुळे नाभिक व्यावसायिकांना दिलासा मिळाला; मात्र ग्रामपंचायत व नाभिक संघटनेने ठरवून दिलेल्या अटी-शर्तींनुसार व्यवसाय करावा लागणार आहे.

महागडे पीपीई किट परवडत नसल्याने, केशकर्तनालयांच्या चालकांनी त्यावर जुगाड शोधला. पीपीई किटऐवजी 300 ते 500 रुपयांपर्यंत रेनकोट व तोंडावर फेसशिल्ड लावून दाढी-कटिंगचे काम सुरू आहे. अर्थात, काही ठरावीक दुकानदारांनीच असा पर्याय शोधला. काही जण अजूनही बेफिकीर असल्याचे दिसते.

हेही वाचा - बेरोजगारीची नो चिंता ः रोहित पवार देणार तरूणांना नोकरी

केशकर्तनालये सुरू करताना सुरक्षित अंतर, अंगावर पीपीई किटसारखा पोशाख, चेहऱ्यावर मास्क लावणे, ग्राहकांच्या अंगावर सॅनिटायझर फवारणी, ग्राहकांनी स्वतःचे ऍप्रन, टॉवेल, नॅपकिन, तसेच दाढी-कटिंगपूर्वी वॉश बेसिनमध्ये हात धुऊनच खुर्चीवर बसणे, दाढी-कटिंगचे साहित्य सॅनिटाइझ करणे, दुकानात किंवा बाहेर बसताना चेहऱ्याला मास्क लावणे, ग्राहकाचे नाव, गाव व मोबाईल क्रमांक आदींच्या नोंदी ठेवणे, अशी नियमावली केशकर्तनालय चालकांसाठी बंधनकारक केली आहे. खबरदारीचा उपाय म्हणून सलूनचालकांनी रेनकोट वापरून पीपीई किटचा जुगाड केला  आहे. मात्र, त्याचे पालन काही ठरावीक दुकानदारच करताना दिसतात.

लॉकडाउनच्या काळात बंद असलेली केशकर्तनालये शुक्रवारपासून (ता. 22) उघडली. "बंद'च्या काळात काही केशकर्तनालय चालकांनी व त्यांच्या हाताखालील कारागिरांनी थेट ग्राहकांच्या घरी जाऊन, अगदी वाड्या-वस्त्यांवर जाऊन दाढी-कटिंगची कामे केली. अन्य दुकाने सुरू झाली तरी ग्राहकांशी थेट जवळून संपर्क येत असल्याने केशकर्तनालये उघडण्यासाठी परवानगीस जास्त काळ लागला. आता ही दुकाने उघडली असून, सुरक्षित अंतर ठेवून केशकर्तनाचे काम सुरू झाले आहे. 

केशकर्तनालयामध्ये वापरत असलेले रेनकोट कोरोनाप्रतिबंधक नाहीत. ते पूर्णपणे संरक्षण देऊ शकत नाहीत. त्यावर कोरोना विषाणू दोन तास जिवंत राहू शकतो. डॉक्‍टर वापरत असलेले पीपीई किट आयसीएमआर मान्यताप्राप्त असून, तीच पूर्ण सुरक्षित आहेत. 
- डॉ. संजय घोलप, मुख्य वैद्यकीय अधिकारी, प्राथमिक आरोग्य केंद्र, कोल्हार