राशीन : मुंबई (वाशी) येथून राशीनला सुनेसोबत आलेल्या वृध्देचा कोरोनाने मृत्यू झाला असून संबंधित महिलेच्या सहा वर्षाच्या नातीला बाधा झाली होती. ती नगरच्या रूग्णालयात उपचार घेत आहे. या पहिल्या धक्‍यातून राशीनकर सावरत असतानाच आज पुन्हा कोरोनाचा पॉझिटिव्ह रूग्ण सापडल्याने लॉकडाऊन शिथील करण्याच्या राशीनकरांच्या मनसुब्यावर पाणी पडले आहे.

येथील एका रूग्णाचा आज पॉझिटिव्ह रिपोर्ट आल्याने राशीनकरांचे पुन्हा धाबे दणादले आहे. संबंधित व्यक्तीने लॉकडाऊनच्या काळात कामानिमित्त राशीन ते पुणे असा प्रवास केला होता. तेथूनच कोरोनाचा वानोळा पुन्हा राशीनकरांसाठी आणल्याची राशीनमध्ये चर्चा आहे.

हेही वाचा - त्या जुळ्यांना कोण गाईल अंगाई, काल जन्म दिला आज कोरोनाने नेली आई

आज पॉझिटिव्ह आलेला रूग्ण राशीनच्या प्राथमिक आरोग्य केंद्रात (ता.25 व 26 मे रोजी ) गेला होता. मात्र त्याने पुण्याहून आल्याचे सांगितले नव्हते. त्यानंतर बुधवारी (ता.27) तो पुण्याहून आला असल्याचे डॉक्‍टरांना समजल्यावर या रूग्णामध्ये कोरोना संशयित लक्षणे जाणवल्याने त्यांनी स्वॅब घेण्यासाठी नगर येथील जिल्हा रूग्णालयात पाठविले होते. त्याचा रिपोर्ट आज पॉझिटिव्ह आल्याने संबंधित व्यक्ती राहत असलेल्या भागात तातडीने धडक कृती दलाची तुकडी पाठवून संबंधित भाग सील केला आहे.

या रूग्णाच्या दोन मुली, एक मुलगा आणि वृध्द वडिलांना होम क्‍वारंटाईन करण्यात आले होते. त्यांनाही स्वॅब घेण्यासाठी आज सायंकाळी हलविण्यात आले. या रूग्णाच्या आरोग्य विभागातर्फे संबंधित रूग्णाच्या संपर्कात आलेल्यांची तपासणी करण्यासाठी तातडीने शोध मोहीम राबविण्यात आली आहे. या रूग्णाने पुणे ते राशीन कोणत्या वाहनाने प्रवास केला आणि त्यानंतर तो कोणाकोणाच्या संपर्कात आला याची चौकशी करून संबंधितांना तातडीने क्‍वारंटाईन करून तपासणी करण्यात यावी, अशी मागणी ग्रामस्थांमधून होत आहे. 

पॉझिटिव्ह आलेल्या रूग्णाच्या कुटूंबातील त्याच्या नातेवाईकांना तपासणीसाठी आरोग्य विभागाने तातडीने ताब्यात घेतले आहे. या रूग्णास पुण्याहून आल्यापासून घशाचा व खोकल्या त्रास होत होता. हा रूग्ण कोणा-कोणाच्या संपर्कात आला असेल याची माहिती प्रशासनाला घ्यावी लागेल व तातडीने उपाययोजना राबवाव्या लागतील. 

संबंधित रूग्णाच्या कुटूंबातील चौघे आणि यांच्या दोन भावांच्या कुटूंबातील दहाजण मिळून चौदा जणांना स्वॅब घेण्यासाठी नगर जिल्हा रूग्णालयात पाठविण्याची व्यवस्था केली आहे. तसेच त्यांच्या संपर्कात आलेल्या इतरांची आरोग्य विभागाकहून शोध मोहिम सुरू आहे.

डॉ. दिलीप व्हरकटे, वैद्यकीय अधिकारी, राशीन.

पॉझिटिव्ह आलेल्य रूग्णाच्या संपर्कातील चार जणांना क्‍वारंटाईन करण्यात आले होते. त्यांना स्वॅब घेण्यासाठी नगरला पाठविणार आहोत. तसेच तातडीने आवश्‍यक त्या उपाययोजना तातडीने राबविण्यात येतील.

नानासाहेब आगळे, तहसीलदार,कर्जत.