नगर ः जुन्या काळी झेडपी नावाचा एक मराठी सिनेमा आला होता. तत्कालीन भ्रष्ट परिस्थितीवर त्यात भाष्य केलं होतं. परंतु आजच्या काळातही त्यात फारसा फरक पडलेला नाही. नगर जिल्हा परिषदेचे काही विभाग तोडपाण्यासाठी परचित आहेत. सर्वसाधारण सभेतच काही सदस्यांनी त्याची जाहीर वाच्यता केली होती. 

काल तर अजब प्रकार घडला. त्या तोडपाण्याचीच चर्चा जिल्हा परिषदेच्या वर्तुळात दिवसभर सुरू होती. तोडपाण्याचा बेत ठरला. जिल्हा परिषदेच्या स्वच्छता गृहात शक्‍यतो, हे असले तोडपाण्याचे कार्यक्रम होतात. हे उघड गुपित आहे. 

चहापाणी कोठे घ्यायचे, हेही ठरले होते. त्यासाठीची वेळही मुकर्रर झाली होती. परंतु या चहापाण्याच्या कार्यक्रमावर नजर ठेवण्यासाठी सरकारी पाहुणे येणार असल्याची कुणकुण संबंधिताला लागली. त्यामुळे उगाच वेगळ्याच लफड्यात नको अडकायला म्हणून त्याने इरादा बदलला.

हेही वाचा - संगमनेरमध्ये कोरोना साखळी सामना, १० बाद १००

पाहुणे आले नि संबंधितांचे धाबेच दणाणले. त्याच्या अंगातून घामाच्या धारा वाहायला लागल्या. 
मनातील भीती चेहऱ्यावर न दाखविता त्यांनी आपले दैनंदिन कामकाज सुरूच ठेवले. पण हे पाहुणे नेमके कोणाकडे आले कोणाला स्पष्ट माहिती नसल्याने या विभागातून त्या विभागातील मित्रांकडून घेण्याचा प्रयत्न काहींनी केला. 
लक्ष्मीदर्शनानंतरच कामे होत असल्याने सदस्यांसह पदाधिकाऱ्यांनी अधिकाऱ्यांना धारेवर धरले. संबंधितांच्या कानउघडणीनंतरही चहापाणी, तोडपाणी सुरू आहे. अशाच एका प्रकरणाचा पर्दाफाश करण्यासाठी जिल्हा परिषदेत पाहुणे आल्याची चर्चा कर्मचाऱ्यांमध्ये सलग दुसऱ्या दिवशीही चर्चा सुरु होती. मात्र, पाहुणे कोणत्या विभागामध्ये आले होते, हे स्पष्ट झाले नाही. पाहुणे आले व गेले गेल्याच्या चर्चेपासून मात्र अधिकारी अनभिज्ञ होते. त्यामुळे पाहुणे न येताच कोणी तरी अफवा पसरविल्याची शक्‍यता आता कर्मचाऱ्यांमधून व्यक्त होत आहे. जे तोडपाणी, चहापाणी करतात, त्यांची सध्या बोलतीच बंद झाली आहे.