लोणी : पुण्याचे अतिरिक्‍त जिल्हाधिकारी साहेबराव गायकवाड यांच्या मृत्यू प्रकरणाची सीबीआय चौकशी करण्याची मागणी भाजपचे ज्येष्ठ नेते माजी मंत्री, आमदार राधाकृष्ण विखे पाटील यांनी केली आहे. गायकवाड यांच्या मृत्यूमागे महसूल विभागातील बदल्यांमधील आर्थिक हितसंबंधच कारणीभूत असल्याचा थेट आरोप विखे पाटील यांनी केला आहे. 

हेही वाचा- वो बुलाती है मगर जाने का नही..

अतिरिक्‍त जिल्हाधिकारी साहेबराव गायकवाड यांचे राहत्या घरी हृदयविकाराच्या तीव्र धक्‍क्‍याने गुरुवारी (ता. 7) निधन झाले. एक उमदा व कार्यक्षम अधिकारी गमावल्याचे अनेक अधिकाऱ्यांनी हळहळ व्यक्त केली होती.

चारच दिवसांत पुन्हा बदली

गायकवाड यांच्या मृत्यूची वेगळीच कारणं आता समोर येत असल्याचे सांगून विखे पाटील म्हणाले, ""साताऱ्यातून आठ महिन्यांपूर्वीच गायकवाड यांची पुण्यात बदली झाली होती. मात्र, चारच दिवसांत त्यांची पुन्हा पिंपरी चिंचवड महापालिकेच्या अतिरिक्त आयुक्तपदी अचानक बदली करण्यात आली. असे कोणते कारण घडले, की चारच दिवसांत त्यांची पुन्हा बदली करण्यात आली.'' 

मोठे आर्थिक हितसंबध गुंतल्याची चर्चा

विखे पाटील म्हणाले, ""प्रशासनापुढे सध्या कोरोना संकटाचे मोठे आव्हान आहे. अशा वेळी गायकवाड यांची बदली होणे हे संशयास्पद ठरते. सध्या राज्य सरकारने प्रशासनातील सर्व बदल्यांना स्थगिती दिली असतानाही महसूल विभागातील विशिष्ट पदावर कार्यरत असलेल्या गायकवाड यांची बदली कशी झाली, याची चौकशी करावी. या प्रकरणात मोठे आर्थिक हितसंबध गुंतले असल्याची चर्चा महसूल विभागातूनच पुढे आली आहे.'' 

बदलीला "मॅट'मध्ये स्थगितीही

गायकवाड यांनीच या बदलीला "मॅट'मध्ये आव्हान देऊन स्थगितीही मिळवली होती. बदलीच्या घोळामुळे अनेक दिवसांपासून ते तणावात होते. त्यामुळेच त्यांच्यावर कोणी दबाव आणला का, याचीही चौकशी होणे गरजेचे आहे, अशी मागणी विखे पाटील यांनी केली आहे.