टाकळी ढोकेश्वर : राज्याचे तत्कालीन कृषी आयुक्त धिरजकुमार हे मागील वर्षी एक दिवस बळीराजासाठी या अभियानातंर्गत किन्ही(ता.पारनेर) येथील बहिरोबावाडी येथे आलेले होते. त्यावेळी अनुदानपर ट्रॅक्टरचे वितरण शेतकरी सचिन मोढवे यांना केले होते. मात्र दहा महिने उलटूनही एक लाख रूपये अनुदान मिळाले नाही.

याबाबत माहीती अशी की, कृषी विभागाच्या वतीने राज्यातील शेतकऱ्यांना एकात्मिक फलोत्पादन विकास अभियान एमआयडीएच या योजनेतंर्गत ट्रॅक्टर व अवजारांसाठी अनुदान दिले गेले.

शेतकऱ्यांकडून ऑनलाईन अर्ज मागवुन व प्राप्त अर्जांमधुन सोडत पद्धतीने लाभार्थी शेतकऱ्यांची निवड करण्यात आली. या योजनेतंर्गत किन्ही येथील शेतकरी सचिन पोपट मोढवे यांना २७ एचपी ट्रॅक्टर सोडत पद्धतीने मागील वर्षी ऑगस्ट महिन्यात मंजुर झाला होता.

संबंधित शेतकऱ्यांनी कर्ज घेऊन ट्रॅक्टर खरेदी देखील केला. त्याचदरम्यान महाराष्ट्र राज्याचे तत्कालीन कृषी आयुक्त श्री धिरजकुमार हे एक दिवस बळीराजासाठी या अभियानातंर्गत बहिरोबावाडी (किन्ही) येथे आलेले होते.

त्यावेळी संपूर्ण कृषी विभागाचे अधिकारी उपस्थित होते. या सर्वांच्या उपस्थितीत मोठ्या उत्साहात संबंधित शेतकरी सचिन मोढवे यांना ट्रॅक्टरचे वितरण देखील करण्यात आले. परंतु या गोष्टीला दहा महिने होऊन गेले तरी कृषी विभागाकडून संबंधित शेतकऱ्याला एक लाख रुपये अनुदान अद्याप मिळालेले नाही.

पारनेर तालुक्यातील या एका शेतकऱ्याबरोबर संगमनेर तालुक्यातील पाच व कोपरगांव तालुक्यातील एक असे नगर जिल्ह्यातील सात शेतकरी अनुदानापासून वंचित असुन संबंधित शेतकरी कृषी विभागावर नाराज आहेत.

अनुदान शेतकऱ्यांना वेळेत न मिळाल्याने शेतकऱ्यांना आर्थिक संकटाचा सामना करावा लागत आहे.जिल्ह्यातील सात शेतकऱ्यांचे दहा महिन्यांपासून अनुदान रखडले आहे हि बाब अतिशय गंभीर आहे कृषी विभागाने तातडीने संबंधित शेतकऱ्यांच्या खात्यावर अनुदान वर्ग करावे अन्यथा संबंधित शेतकऱ्याचा ट्रॅक्टर तालुका कृषी अधिकारी कार्यालयासमोर आणुन लावला जाईल

- अनिल देठे, शेतकरी नेते