अहमदनगर : आगामी लोकसभा निवडणुकीसाठी ५ जानेवारी २०२४ रोजी अंतिम मतदार यादी प्रसिद्ध होणार आहे. १८ ऑक्टोबरपर्यंत हे काम पूर्ण होईल. राज्यातील ९० टक्के काम पूर्ण झाले आहे. ईव्हीएम मशिनची तपासणी झाली आहे. सर्व मशिन २४ तास सीसीटीव्हीच्या निगराणीखाली स्ट्राँग रूममध्ये आहेत, अशी माहिती राज्याचे मुख्य निवडणूक अधिकारी श्रीकांत देशपांडे यांनी दिली.

जिल्हाधिकारी कार्यालयात मतदार साक्षरता मंडळाची कार्यशाळा शुक्रवारी (ता. १५) पार पडली. कार्यशाळेनंतर देशपांडे यांनी पत्रकारांशी संवाद साधला. ते म्हणाले, की राज्यात सध्या मतदार जागृती मोहीम सुरू आहे. त्यानुसार जिल्हा निवडणूक शाखेतर्फे जिल्ह्यातील ३८ महाविद्यालयांचे नोडल अधिकारी आणि विद्यार्थ्यांसाठी मतदार साक्षरता कार्यशाळा घेण्यात आली. निवडणूक विभाग राज्यात घरोघरी जाऊन मतदारांची पडताळणी करीत आहे.

सिद्धाराम सालीमठ म्हणाले, की बीएलओंना ऑनलाइन व ऑफलाइन अशा दोन्ही सुविधा आहेत. नवीन मतदार नोंदणी करणे, मृत व विस्थापितांची नाव वगळणे, अशी प्रक्रिया सुरू आहे. लोकसभा निवडणुकीच्या अनुषंगाने जिल्ह्यात नवीन दाखल झालेल्या मतदान यंत्रांची तपासणी पूर्ण झाली आहे.

या तपासणीत नादुरुस्त यंत्रे पुन्हा कंपनीकडे पाठविली आहेत. सध्या मतदानासाठी सुस्थितीत असलेली ९ हजार ८९० बॅलेट, ५ हजार ५६७ सेंट्रल युनिट व ६ हजार १७ व्हीव्ही पॅट मशिन उपलब्ध आहेत. जिल्ह्यासाठी सुमारे साडेतीन हजार मतदान यंत्रांची आवश्यकता असते.

२६ हजार ३२० नवमतदारांची नोंदणी

जिल्ह्यात २८ हजार २१४ मतदार मृत आढळले. ११ हजार ३६ मतदार कायमस्वरूपी स्थलांतरित झाले. ही नावे मतदार यादीतून वगळली जातील, तसेच १५ हजार ३३ मतदारांनी दुरुस्तीसाठी अर्ज दाखल केले आहेत. २६ हजार ३२० नवमतदारांची मतदार यादीत नावनोंदणी केली आहे.

ही मोहीम २ ऑगस्ट रोजी एकाच वेळी जिल्ह्यातील १०७ महाविद्यालयांमध्ये राबवली. त्यातून ४ हजार २६ युवा मतदारांची नोंदणी केली आहे. त्याशिवाय १२ व १३ ऑगस्ट रोजी ग्रामीण भागात २ हजार ३९१ वाड्या-वस्त्या-तांडे व पाडे या ठिकाणी मतदार नोंदणी केली.