नगर तालुका ः दोन दिवसांपासून नगर तालुक्‍यात सर्वदूर पावसाने हजेरी लावली आहे. त्यामुळे बळिराजा सुखावला असला, तरी खातगाव येथील मेंढपाळावर मात्र मोठे संकट कोसळले. या परिसरात वीज पडल्याने 14 शेळ्या, मेंढ्या व कुत्र्याचा मृत्यू झाल्याने मेंढपाळाचे पावणेदोन लाखांचे नुकसान झाले.

हेही वाचा ः सौ शेरी, एक संगमनेरी पण आता कोरोना ठरतोय भारी... बाधित सेंच्युरीच्या वाटेवर

संतोष पवार (रा. खातगाव, ता. नगर) हे नेहमीप्रमाणे शेळ्या व मेंढ्या चारण्यासाठी खातगाव ते निमगाव घाणा रस्त्यावर घेऊन गेले होते. दुपारी दोनच्या सुमारास या परिसरात विजांच्या कडकडाटासह पावसाला सुरवात झाली. पावसामुळे जनावरे सैरावैरा पळायला लागल्याने पवार यांनी सर्व जनावरे परिसरातील एका बाभळीच्या झाडाखाली आणली. 

क्लिक करा ः वजन, दराची माहिती मोबाईलवर

झाडाच्या आडोशाला जनावरांसह तेही उभे होते. परंतु जनावरे भुकेलेली होती. त्यामुळे शेळ्या पावसात जाऊ लागल्याने पवार यांनी बाभळीच्या फांद्या तोडून त्यांना खाऊ घालत होते.

दरम्यान विजांचा कडकडाट होऊन बाभळीच्या झाडांच्या परिसरात अचानक वीज पडली. यामध्ये पवार यांच्या सहा मेंढ्या, सात शेळ्या व एक पाळीव कुत्रा अशी 14 जनावरे मृत्युमुखी पडली. तीन शेळ्या जखमी झाल्या आहेत. यामध्ये पवार यांचे पावणेदोन लाखांचे नुकसान झाले. तलाठी व पशुवैद्यकीय अधिकारी डॉ. मुकुंद राजळे यांनी घटनास्थळी भेट देऊन पंचनामा केला.