नगर : जिल्हाधिकाऱ्यांनी मुख्यालय न सोडण्याचे दिलेले आदेश डावलत जिल्ह्यातील कर्मचारी कोरोना बाधितांना व आजारी रुग्णांना भेटून येत आहेत. त्यामुळे जिल्हाधिकाऱ्यांचा आदेश हा केवळ नावालाच उरला आहे. एकीकडे सामान्य नागरिकांना लॉकडाउनच्या नावाखाली वेठीस धरणारे प्रशासन मात्र शासकीय कर्मचाऱ्यांना थांबविण्यात मुख्यालयात ठेवण्यास कमी पडत आहे. जिल्हा प्रशासनाकडून जिल्हा सहाय्यक पुरवठा अधिकाऱ्यांना क्‍वारंटाईनची शिक्षा, नायब तहसीलदार रितसर पास काढू गेले तरी गुन्हा दाखल करण्यात येतो मात्र त्याच वेळी जिल्हा क्रीडा अधिकाऱ्यांनी पास न काढता जाऊनही सोडून देण्यात येते. या वेगवेगळ्या न्यायामुळे शासकीय कर्मचाऱ्यांचे धाडस वाढत असल्याची चर्चा शासकीय कर्मचाऱ्यांत आहे. 

हेही वाचा - उपमहापौर मागताहेत महापालिकेसाठी अभियंते 

जिल्ह्यात कोरोना विषाणूंचा प्रादुर्भाव वाढू नये म्हणून जिल्हाधिकारी राहुल द्विवेदी यांनी आदेश काढून शासकीय कर्मचाऱ्यांना मुख्यालय (काम करत असलेले गाव) न सोडण्याचे निर्देश दिले होते. मात्र नगर शहरातील एका शासकीय महाविद्यालयातील कर्मचारी जिल्हाधिकाऱ्यांचा आदेश धुडकावत बाहेर गावी गेला. तेथे त्याला कोरोनाची लागण झाली. कोराना पॉझिटिव्हचा रिपोर्ट हाती येण्या आधी हा महाशय महाविद्यालयातील प्राचार्यांचा "बर्थ डे' करून आला. त्यामुळे या महाविद्यालयातील प्रशासनावर जिल्हाधिकारी कारवाई करणार का असा प्रश्‍न उपस्थित होत आहे. जिल्हाधिकाऱ्यांनी या पूर्वी वेगवेगळ्या अधिकाऱ्यांना वेगवेगळा "न्याय' दिल्यामुळे कर्मचाऱ्यांत असे धाडस निर्माण होत असल्याची चर्चा सध्या शासकीय कर्मचाऱ्यांत आहे. 

शहरातील एका शासकीय महाविद्यालयातील कर्मचारी भिंगार परिसरात राहतो. तो काही दिवसांपूर्वी कोल्हार येथील आपल्या आजारी असलेल्या नातेवाईकाला भेटण्यासाठी वडिलांसह गेला. काही दिवसांतच त्याच्या वडिलांनाही खोकला, ताप असा त्रास होऊ लागला. त्याच्या नातेवाईकाची कोरोना चाचणी केल्यावर तो बाधित असल्याचे आढळून आले. त्यामुळे त्याच्या वडिलांचीही तपासणी करण्यात आली. वडीलही कोरोना बाधित आढळून आले. त्यांना लोणी (ता. राहाता) येथे उपचारासाठी दाखल करण्यात आले. हे महाशय पुन्हा वडिलांना भेटण्यासाठी लोणीला गेले. दरम्यान महाविद्यालयाच्या प्राचार्यांचा वाढदिवस होता. त्यांना शुभेच्छा देण्यासाठी हे महाशय बुके घेऊन हजर. बुके दिल्यावर दोन दिवसांनी हे महाशयही कोरोना बाधित आढळून आले.