पारनेर ः वाघोली (जि. पुणे) येथील जागेच्या व्यवहारातून टाकळी ढोकेश्‍वर येथील एकाची पाच कोटी रुपयांची फसवणूक झाली.

या बाबत पारनेर पोलिसांनी दलालासह पाच जणांविरुद्ध गुन्हा दाखल केला. एजंट भुवनेश्वर कुमार साल व ऍड. अजयसिंग (दोघेही रा. चंदीगढ), विशाल चव्हाण (रा. दिल्ली), अशोक भोपालसिंग चौधरी व जिमी अशोक चौधरी (दोघेही रा. उत्तर प्रदेश) अशी आरोपींची नावे आहेत.

या बाबत टाकळी ढोकेश्वर येथील मातोश्री शैक्षणिक प्रतिष्ठानाचे किरण आहेर यांनी पारनेर पोलिस ठाण्यात फिर्याद दिली. त्यानुसार, वाघोली येथे स्वस्तात जमीन देण्याचे आमिष दाखवून वरील आरोपींनी आहेर यांच्याकडून पाच कोटी रुपये घेतले. मात्र, नंतर त्यांच्यातील व्यवहार फिस्कटला. त्यामुळे आहेर यांनी पाच कोटी रुपये परत मागितले. आरोपींनी बनावट डिमांड ड्राफ्ट तयार करून, त्यावर बनावट बॅंक अधिकाऱ्यांच्या सह्या घेतल्या. 

हेही वाचा - मिलिटरीच्या पारनेरमध्ये चकरा, गावकरी धास्तावले

पुणे येथून आरोपी मातोश्री प्रतिष्ठानाच्या टाकळी ढोकेश्वर येथील महाविद्यालयात आले. तेथे भुवनेश्‍वर कुमार साल याने विशाल चव्हाण याच्याशी कॉन्फरसिंग कॉलद्वारे आहेर यांच्याशी बोलणे करून दिले. त्यावेळी चव्हाण याने बॅंक अधिकारी असल्याचे सांगून उद्यापर्यंत पैसे खात्यावर वर्ग होतील, असे सांगितले. मात्र, वेळोवेळी विचारणा करूनही आहेर यांना पैसे मिळाले नाहीत. त्यामुळे त्यांनी पारनेर पोलिस ठाणे गाठले. पोलिसांनी पाच जणांविरुद्ध फसवणुकीचा गुन्हा दाखल केला आहे. 

संपादन - अशोक निंबाळकर